नारायणगाव, ता. ५ : स्थानिक गुन्हे शाखा व दहशतवाद विरोधी शाखा पथकाने नारायणगाव (ता. जुन्नर) येथील बसस्थानकात संयुक्तरित्या कारवाई करून अवैधरीत्या गावठी पिस्तूल बाळगल्याने तीन तरुणांना अटक केली. आरोपींकडून तीन गावठी पिस्तूल, नऊ काडतुसे व मोटार सायकल, असा १ लाख ७५ हजार रुपये किमतीचा मुद्देमाल जप्त केला, अशी माहिती स्थानिक गुन्हे शाखेचे सहायक पोलिस निरीक्षक महादेव शेलार यांनी दिली.
याप्रकरणी धनंजय चक्रधर साळुंखे (वय २०), अनमोल दादाभाऊ जाधव (वय २७, दोघेही रा. कारेगाव, ता. शिरूर), सूरज अप्पासाहेब कर्डिले (वय १८, रा. रामलिंग, ता. शिरूर) या आरोपींना नारायणगाव बसस्थानकात सापळा रचून अटक केली.
अवैध गावठी पिस्तूल तस्करी करणारे व खरेदी- विक्री करणाऱ्या व्यक्ती नारायणगाव पोलिस ठाण्याच्या हद्दीमध्ये येणार असल्याची माहिती स्थानिक गुन्हे शाखेला मिळाली होती. त्यानुसार स्थानिक गुन्हे शाखा व दहशतवाद विरोधी शाखा पथकाने संयुक्तरित्या कारवाई करून आरोपींना ३० ऑक्टोबर रोजी अटक केली. आरोपींना चार दिवसाची पोलिस कोठडी दिली होती. ही कारवाई स्थानिक गुन्हे शाखेचे पोलिस निरीक्षक अविनाश शिळीमकर, दहशतवाद विरोधी पथकाचे सहाय्यक पोलिस निरीक्षक प्रकाश पवार, स्थानिक गुन्हे शाखेचे सहाय्यक पोलिस निरीक्षक महादेव शेलार, प्रवीण सपांगे, फौजदार जगदीश पाटील, अंमलदार दीपक साबळे, विक्रम तापकीर, मोसीन शेख, संदीप वारे, ओंकार शिंदे, गणेश चंदनशीव, हेमंत विरोळे, अक्षय नवले, रवींद्र जाधव, सुनील कोळी, संकेत जाधव, चेतन पाटील यांच्या पथकाने केली.