नारायणगाव, ता. १२ : वारूळवाडी (ता.जुन्नर) ग्रामपंचायत हद्दीतील आनंदवाडी येथील मनोज वाजगे यांच्या शेतात बिबट्याला जेरबंद करण्यासाठी सोमवारी (ता. १२) दुपारी पिंजरा लावण्यात आला आहे.
मागील दोन महिन्यांपासून या भागात बिबट्या व त्याच्या बछड्यांचा वावर आहे. या भागात बिबट्याने मागील आठ दिवसांत दोन पाळीव कुत्री फस्त केली आहेत. मागील महिनाभरात वारूळवाडी परिसरात लावण्यात आलेला हा सहावा पिंजरा असून बिबट्याचा वावर असलेल्या नारायणगाव वनपरिक्षेत्रात एकूण २२ ठिकाणी पिंजरे लावण्यात आले आहेत, अशी माहिती वनरक्षक ज्ञानेश्वर पवार यांनी दिली.
नारायणगाव वनपरिक्षेत्रातील मीना नदी व कुकडी नदी काठावर वसलेल्या नारायणगाव, वारूळवाडी, मांजरवाडी, वळणवाडी, नारायणवाडी, आर्वी, गुंजाळवाडी, ओझर,धनगरवाडी, पिंपळगाव तर्फे नारायणगाव परिसरात वाढलेली बिबट संख्या नियंत्रित करण्यासाठी जुन्नर वनविभागाने गेल्या महिनाभरात बावीस ठिकाणी पिंजरे लावले आहेत. पिंजऱ्यातील भक्ष्यावर हल्ला करण्यासाठी बिबटे बछड्यांसह पिंजऱ्याच्या जवळ येतात. पिंजऱ्यात प्रवेश न करता भक्ष्य ठेवलेल्या पिंजऱ्याच्या भागाकडून भक्ष्यावर हल्ला करण्याचा प्रयत्न करतात. २२ पिंजरे लावून देखील बिबटे पिंजऱ्यात अडकत नसल्याने नवीन समस्या निर्माण झाली असल्याचे मत वनविभागाचे कर्मचारी व्यक्त करत आहेत.

पिंजऱ्यात बिबट जेरबंद झाल्यानंतर पिंजऱ्याभोवती नागरिक गर्दी करतात. बिबट्याचे फोटो व व्हिडिओ काढतात. यामुळे बिबट्या आक्रमक होऊन पिंजऱ्याला धडका देत असल्यामुळे बिबटे डोक्याच्या बाजूकडून जखमी होत आहेत. दुर्घटना टाळण्यासाठी नागरिकांनी पिंजऱ्या सभोवताली गर्दी करू नये.
- ज्ञानेश्वर पवार, वनरक्षक, नारायणगाव वनपरिक्षेत्र विभाग

7739