नसरापूर, ता. २९ : कोळवडी (ता. भोर) येथे ग्रामपंचायतीच्या विहिरीचे काम सुरू असताना क्रेनद्वारे बकेटमधून कामगार विहिरीत उतरत होते. यावेळी क्रेनचा वायररोप तुटला व क्रेनचे बकेट ५० फूट खोल विहिरीत कोसळले. यामुळे एका कामगाराचा जागीच तर दुसऱ्याचा उपचारादरम्यान मृत्यू झाला. ही घटना सोमवारी (ता. २९) दुपारी घडली.
अंकुश प्रभाकर गेडाम (वय २३, रा.येवली रामपुरी, ता.जि. गडचिरोली) व विजेंद्र रामानंद भारद्धाज (वय ४९, रा. उत्तरप्रदेश) ही मृत्यू झालेल्यांची नावे आहेत. विहिरीचे खोदकाम करताना दुपारच्या जेवणाची सुट्टीनंतर पुन्हा काम सुरू करण्यासाठी क्रेनच्या बकेटमध्ये बसवून कामगारांना खाली सोडण्यात येत होते. काही कामगार खाली पोचल्यावर अंकुश व विजेंद्र हे दोघे बकेटमध्ये बसून खाली उतरत होते. यावेळी अचानक क्रेनची वायररोप तुटून बकेट पडले. वायर रोपचा लोखंडी हुक डोक्यात पडल्याने बकेटमधील अंकुश हे जागीच मृत पावले. दरम्यान, घटनास्थळी गावचे पोलिस पाटील अजित शिंदे, प्रमोद शिंदे व इतर कामगारांनी रुग्णवाहिका बोलून जखमींना नसरापूर येथील रुग्णालयात पोचविले. तेथे तर विजेंद्र याच्यावर उपचार सुरू असताना काही तासातच त्याचा मृत्यू झाला.
विहिरीत इतर काम करत असलेले कामगार गुरुदास डोमाजी भोयर, लहू दशरथ शिंदे, सुनील दिगंबर पवार, रंजना लहू शिंदे, रेश्मा सुनील पवार, वनीता तुकाराम शिंदे आदींना दुसऱ्या क्रेनच्या साह्याने सुरक्षित बाहेर काढण्यात आले.

04132