नसरापूर, ता. १ : बहुचर्चित बनेश्वर रस्त्याची जबाबदारी शेवटी पुणे महानगर विकास प्राधिकरणाने घेतली असून, साडेसातशे मीटर रस्त्यासाठी २ कोटी ९४ लाख ३६ हजार रुपयांचा निधी मंजूर केला आहे. जूनच्या पहिल्या आठवड्यात प्रत्यक्ष कामास सुरुवात होणार आहे. ‘पीएमआरडीए’च्या अधिकाऱ्यांनी प्रत्यक्ष रस्त्यावर भेट देऊन नसरापूर ग्रामपंचायतीचे सरपंच, सदस्य व ग्रामस्थांना या होणाऱ्या कामाबाबत माहिती दिली.
नसरापूर गाव ते बनेश्वर मंदिर या रस्त्याची दुरवस्था झाल्याने बनेश्वर देवस्थान ट्रस्ट, नसरापूर ग्रामपंचायत व ग्रामस्थांनी पाठपुरावा केला होता. खासदार सुप्रिया सुळे यांनीदेखील या रस्त्याबाबत आग्रही भूमिका घेऊन जिल्हाधिकारी कार्यालयासमोर लाक्षणिक उपोषणदेखील केले होते. अगोदर जिल्हा परिषदेच्या बांधकाम विभागाने दुरुस्ती करणार असल्याचे जाहीर केले होते. त्यानंतर ‘पीएमआरडीए’ने या रस्त्याची जबाबदारी घेऊन या अभियंत्यांनी रस्त्याची प्रत्यक्ष पाहणी करून अंदाजपत्रक तयार केले आहे. त्यानुसार या रस्त्याच्या नदीकडील बाजूस असलेली जुनी संरक्षक भिंत पाडून नव्याने बांधकाम होऊन संपूर्ण रस्ता सिमेंट काँक्रिटचा होणार आहे.
दरम्यान, शुक्रवारी (ता. ३० मे) ‘पीएमआरडीए’चे उपायुक्त संभाजी पाटील, साहाय्यक अभियंता जयेश बदाने यांनी प्रत्यक्ष रस्त्यावर भेट देत ग्रामपंचायत ग्रामस्थांना रस्त्याच्या होणाऱ्या कामाबाबत माहिती दिली. यावेळी नसरापूरच्या सरपंच उषा कदम, उपसरपंच नामदेव चव्हाण, सदस्य गणेश दळवी, सुधीर वाल्हेकर, इरफान मुलाणी, बनेश्वर देवस्थान ट्रस्टचे उपाध्यक्ष हनुमंत कदम, सचिव अनिल गयावळ, विश्वस्त काशिनाथ पालकर, माजी सभापती लहुनाना शेलार, यशवंत कदम, ज्ञानेश्वर झोरे, विक्रम कदम, ठेकेदार सुरज मरळ आदी उपस्थित होते.
असे होणार काम
या ७५० मीटर लांबीच्या रस्त्यावर साडेपाच मीटर रुंदीचे सिमेंट काँक्रिट होणार आहे. डाव्या बाजूचे पाणी नदी बाजूकडे वाहुन जाण्यासाठी तीन ठिकाणी तीन फूट व्यासाच्या पाईपच्या मोऱ्या टाकल्या जाणार आहेत. या शिवाय दोन फूट व्यासाचे १० पाईप जागोजागी पाणी वाहून जाण्यासाठी आडवे टाकण्यात येणार आहेत. नदी बाजूकडील संरक्षक भिंत २५० मीटर लांबीची होणार आहे, तर उजव्या बाजूकडील माती रस्त्यावर व पाणी वाहणाऱ्या गटारामध्ये येऊ नये, यासाठी संरक्षक भिंत बांधण्यात येणार आहे. या सर्व कामासाठी दहा महिन्यांचा कालावधी लागणार आहे. जूनच्या पहिल्या आठवड्यात काम सुरू होऊन सुरुवातीला संरक्षकभिंतीचे काम सुरू होणार आहे. त्यानंतर वाहतुकीचे नियोजन करून मुख्य रस्त्याचे काम सुरू होणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.