नसरापूर, ता. ३ ः दिवंगत उपमुख्यमंत्री अजित पवार यांच्या निधनाने संपूर्ण महाराष्ट्राला धक्का बसला आहे. जनतेसाठी अहोरात्र झटणारा, प्रशासनासह कार्यकर्त्यांवर देखील मजबूत पकड असलेला अजितदादा पुन्हा होणे नाही, अशा शब्दात देगाव (ता. भोर) येथे अजित पवार यांना श्रद्धांजली वाहण्यात आली.
देगाव ग्रामपंचायत व ग्रामस्थ यांच्या वतीने येथील विठ्ठल रुक्मिणी मंदिर सभागृहात शोकसभेचे आयोजन करण्यात आले. यावेळी आबासाहेब यादव, अशोक शेलार, सरपंच ॲड. संभाजी यादव, राजेंद्र सावंत, तुळशीराम सावंत, प्रशांत यादव, प्रकाश सावंत, आदिनाथ जगताप, गोपाळ यादव, विठ्ठल जाधव, नीलेश कोंढाळकर यांच्यासह ग्रामपंचायत पदाधिकारी व ग्रामस्थ उपस्थित होते.
शोकसभेत अजित पवार यांच्या प्रतिमेस पुष्पहार अर्पण करून अभिवादन करण्यात आले.
यावेळी बोलताना आबासाहेब यादव म्हणाले की, ‘‘लाख मरावे परंतु, लाखाचा पोशिंदा मरू नये, अशी आपल्याकडे म्हण आहे. ती अजितदादा यांना तंतोतंत लागू पडते. राजकीय, सामाजिक तसेच, विविध संस्थांवर काम करताना अजितदादा यांनी सर्वसामान्यांना प्राधान्य दिले. परखड, निर्भीड व चुकीला चुक व बरोबरला बरोबर म्हणण्याची त्यांच्यात हिंम्मत होती. असा हा लाखाचा पोशिंदा जाण्याने महाराष्ट्राचे कधीही भरून न येणारे नुकसान झाले आहे.’’
06164