ओतूर, ता. २७ : जुन्नर तालुक्यातील उदापूर व डिंगोरे येथील विद्यालयांमध्ये ‘शिवनेरीचे शिलेदार’ या व्हाट्स ॲप समूह सदस्यांच्या माध्यमातून पाचवी ते १० वीच्या किशोरवयीन मुलींसाठी आरोग्यविषयक मार्गदर्शन शिबिर आणि ‘प पाळीचा’ या आरोग्य पुस्तिकेचे शनिवारी (ता. २६) वितरण करण्यात आले.
सरस्वती विद्यालय, उदापूर व पुष्पावती विद्यालय, डिंगोरे या दोन शाळांमधील पाचवी ते १० वीच्या अंदाजे ५०० किशोरवयीन मुलींसाठी आरोग्यविषयक मार्गदर्शन शिबिर आणि ‘प पाळीचा’ या आरोग्य पुस्तिकेचा वितरण समारंभ झाला. या उपक्रमात प्राथमिक आरोग्य केंद्राच्या डॉ. वैष्णवी ठिकेकर यांनी विद्यार्थिनींना शारीरिक स्वच्छता, मासिक पाळीतील काळजी, योग्य आहार व आरोग्यविषयक प्रश्‍न यावर सखोल मार्गदर्शन केले. विद्यार्थिनींच्या विविध प्रश्‍नांना त्यांनी समर्पक उत्तरे देत संवादात्मक पद्धतीने कार्यक्रम राबविला. याशिवाय समूह सदस्य साक्षी तांबे व सुशीला डुंबरे यांनीदेखील आरोग्याबाबत मुलींशी चर्चा केली. या उपक्रमामुळे किशोरवयीन विद्यार्थिनींमध्ये आरोग्याबाबत जागरूकता निर्माण होण्यास निश्चितच मदत होणार असल्याचे मत महिला वर्गाने व्यक्त केले.
यावेळी समूहाच्या सीमा तांबे, सुरेखा भोर, राणी तांबे, आरोग्य सहाय्यक सविता पगार, डॉ. आचल मेश्राम, शिल्पा रावते आदी उपस्थित होते. कार्यक्रमासाठी सुरेखा धमाले, दीपा सावंत, दत्तात्रेय घोलप, साधना तांबे, वैभव देशमुख, साईनाथ भोर, योगेश गाढवे, रतिलाल बागूल, दिनेश पाटील, मंगेश कोंढार, जगन्नाथ गाढवे, किसन भुतांबरे, सुरेखा ढमाले, सारिका डांगे, मुख्याध्यापक प्रतीक अकोलकर, मुख्याध्यापक शरद माळवे यांचे दोन्ही विद्यालयाच्या शालेय व्यवस्थापन समितीचे सहकार्य लाभले. नंदूशेठ भोर, जालिंदर उकिर्डे, संजय तांबे व अ‍ॅड. जयदीप डुंबरे यांनी नियोजन केले.