ओतूर, ता. २५ : येथे सन २०१६ मध्ये पत्नीचा खून केलेल्या आरोपीला न्यायालयाने जन्मठेप व पन्नास हजार रुपये दंड आणि दंड न भरल्यास ६ महिने अधिक कारावासाची शिक्षा ठोठावली.
ओतूर (ता. जुन्नर) येथील तांबे मळा येथे सन २०१६ मध्ये आरोपी शांताराम बबन डुंबरे (वय ५४) याने दारू पिऊन येऊन राहत्या घरामध्ये त्याची पत्नी रंजना हिचा, ‘तू मुंबईला का राहती? माझ्याजवळ का राहत नाही,’ असे म्हणत रॉकेल ओतून पेटवून देऊन जिवे मारण्याचा प्रयत्न केला. उपचार चालू असताना रंजना हिचा मृत्यू झाला. याबाबत त्यांचा मुलगा अमोल यांनी ओतूर पोलिस ठाण्यात गुन्हा दाखल केला होता. पोलिस उपनिरीक्षक व्ही. जी. पवार यांनी गुन्ह्याची दोषारोप पत्र सत्र न्यायालयात दाखल केले होते. जिल्हा व सत्र न्यायालय जुन्नर येथील न्यायाधीश एस. एस. नायर यांनी साक्षीदार, फिर्यादी, पंच यांची साक्ष घेऊन आरोपी याने गुन्हा केल्याचे निष्पन्न झाल्याने शिक्षा दिली. आरोपी सध्या येरवडा कारागृहात आहे. सहायक पोलिस निरीक्षक एल. जी. थाटे, कोर्ट अंमलदार पूजा औटी, पोलिस अंमलदार अतुल भेके, जुन्नर कोर्ट पैरवी अंमलदार मनिषा ताम्हणे, सरकारी वकील जी. के. खोडे यांनी काम पाहिले.