ओतूर, ता. २८ ः मांदारणे (ता. जुन्नर) गावच्या हद्दीत मुक्ताबाई शिवारात बिबट्याने गोठ्यात बांधलेल्या दोन वासरांवर हल्ला करून त्यांना जागीच ठार केले आहे.
बिबट्याने रविवारी (ता. २८) पहाटे येथील मुक्ताबाई मंदिराजवळ असलेल्या किसन रंगनाथ महाकाळ यांच्या गोठ्यात पहाटे प्रवेश करून गोठ्यातील दोन वर्षाचा गावठी गोऱ्हा व एक जर्शी वासरू जागीच ठार केले. याबाबत ओतूर वनविभागाला माहिती दिल्यानंतर प्रभारी वनक्षेत्र अधिकारी प्रदिप चव्हाण यांच्या मार्गदर्शनाखाली वनकर्मचारी मोहिनी वाघचौरे यांनी घटनास्थळी पाहणी करून पंचनामा केला. बाधित शेतकऱ्याला शासकीय नियमानुसार आर्थिक मदत दिली जाणार असल्याची माहिती वनविभागाकडून सांगण्यात आले.
याठिकाणी एक पेक्षा जास्त बिबटे असून, आता मुक्ताबाई मंदिरात नवरात्रौत्सवानिमित्त काकडा, पारायण व हरिपाठ असे विविध धार्मिक व सामाजिक कार्यक्रम सुरू आहेत. वनविभागाने घटनेचे गांभीर्य पाहता त्वरित या परिसरात पाहणी करून बिबट्यांचा बंदोबस्त करण्यासाठी पिंजरा लावावा, अशी मागणी नागरिकांनी केली आहे.