ओतूर, ता‌. ६ : ओतूर (ता. जुन्नर) येथील पुणे जिल्हा शिक्षण मंडळाचे अण्णासाहेब वाघिरे महाविद्यालयात शुक्रवारी (ता. ३) स्वच्छता ही सेवा या उपक्रमांतर्गत व राष्ट्रपिता महात्मा गांधी आणि लालबहादूर शास्त्री यांच्या जयंतीचे औचित्य साधून स्वच्छता अभियान उत्साहात पार पडल्याची माहिती राष्ट्रीय सेवा योजनाचे अधिकारी डॉ. राजेंद्र आंबवणे व महाविद्यालयाचे प्राचार्य डॉ. महेंद्र अवघडे यांनी दिली.
डॉ. आंबवणे म्हणाले की, स्वच्छतेचे आरोग्याशी असलेले निकटचे नाते अधोरेखित केले. या वेळी महाविद्यालयातील विद्यार्थ्यांनी महाविद्यालयीन परिसर स्वच्छ करण्यासाठी विशेष उपक्रम राबविला. परिसरातील कचरा व तीन गोणी प्लॅस्टिक गोळा करून त्याची योग्य प्रकारे विल्हेवाट लावली. या उपक्रमात राष्ट्रीय सेवा योजनेतील एकूण ७७ स्वयंसेवक सहभागी झाले. या वेळी मराठी विभाग प्रमुख डॉ. वसंत गावडे, हिंदी विभाग प्रमुख डॉ. राजेंद्र रसाळ, भूगोल विभागातील डॉ. रमेश गोपाळे आदी उपस्थित होते.
हा कार्यक्रम यशस्वी होण्यासाठी राष्ट्रीय सेवा योजना कार्यक्रमाधिकारी प्रा. सुवर्णा डुंबरे व डॉ. विनायक कुंडलिक यांनी विशेष प्रयत्न केले, तसेच राष्ट्रीय सेवा योजनेतील स्वयंसेवकांनी स्वच्छता अभियान यशस्वी होण्यासाठी महत्त्वाची भूमिका बजावली.