ओझर, ता.३० : जुन्नर तालुका निसर्ग संपन्नतेने नटलेला असून सह्याद्रीच्या पर्वतरांगा, दऱ्याखोऱ्यांमुळे पावसाळ्याच्या दिवसांत सृष्टीने परिधान केलेल्या हिरवळीने हा परिसर अधिकच खुलून दिसतो. त्यामुळे पर्यटकांना जुन्नरच्या निसर्ग सौंदर्याची भुरळ पडते आणि त्यांचे पाय आपसूकच जुन्नरकडे वळतात.
वन्यजीव तसेच पशुपक्ष्यांमुळे देखील पर्यटक आकर्षित होत आहेत.जुन्नर परिसरात आता मोरांची संख्या देखील वाढली असून डोंगराच्या कडेला जंगल परिसरात मोठ्या संख्येने मोर पहावयास मिळतात. येथील नेतवड, हिवरे बुद्रुक, तेजेवाडी, शिरोली खुर्द तसेच शिरोली बुद्रुक येथे असलेल्या वन परिक्षेत्रात डोंगरालगत मोरांचा मुक्त संचार आढळतो. येथे दररोज पहाटे व सायंकाळच्या वेळी अन्न पाण्याच्या शोधात मोर आणि लांडोर मोठ्या संख्येन फिरत असल्याचे दिसून येते.एवढ्या मोठ्या संख्येने मोर आढळणे पर्यटकांसाठी पर्वणीच आहे. या गोष्टीचा उपयोग पर्यटन वाढीसाठी करून घेण्याची खरी गरज आहे.

वन्यजीवांचे संगोपन संरक्षण
महाराष्ट्र शासनाने जुन्नर तालुक्याला पर्यटन तालुका म्हणून घोषित केले आहे. येथे बिबट्या, लांडगा,कोल्हा, ससा, नीलगायी यासारखे वन्य प्राणी आढळत आहेत. शासनाने वन्यजीवांचे संगोपन संरक्षण योग्य रीतीने केल्यास त्यांची संख्या वाढेल व त्यांना पाहण्यासाठी मोठया संख्येने पर्यटकही मोठ्या संख्येने आकर्षित होतील आणि रोजगार निर्माण होईल.

वन्यप्राण्यांच्या संगोपनासाठी या उपायांची गरज
१. सर्वप्रथम वन्य प्राण्यांची मोजदाद आवश्‍यक
२. सुरक्षिततेच्या दृष्टिकोनातून उपाययोजना गरजेच्या.
३. पक्ष्यांची शिकार करणाऱ्यांवर तसेच जंगलतोड करणाऱ्यांवर कठोर कारवाई
४. वन्यप्राण्यांच्या अधिवासात दगडाच्या खाणी, संलग्न व्यवसायांवर हवेत निर्बंध

01594