ओझर, ता. १३ : अष्टविनायकातील मुख्य स्थान असलेल्या ओझर (ता. जुन्नर) येथे विघ्नहर गणपतीच्या दर्शनासाठी भाविकांनी सकाळपासून गर्दी केली होती. पहाटे चार वाजता विघ्नहर गणपती देवस्थान ट्रस्टचे अध्यक्ष बाळकृष्ण कवडे, उपाध्यक्ष तुषार कवडे, सचिव सुनील घेगडे, खजिनदार दत्तात्रेय कवडे, विश्‍वस्त विनायक मांडे, संतोष कवडे, प्रकाश मांडे, समीर मांडे, विनायक जाधव, गोविंद कवडे, विलास कवडे, शिल्पा जगदाळे यांच्या उपस्थितीत अभिषेक करून मंदिर दर्शनासाठी खुले करण्यात आले. अंगारकी चतुर्थीनिमित्त मंदिरात गणेशयाग झाला. मान्यवरांच्या हस्ते महाआरती करण्यात आली. सकाळी सात वाजता महाआरती, आठ वाजता पोथीवाचन, दुपारी बारा वाजता मध्यान्ह आरती करण्यात आली. भाविकांना खिचडी वाटप करण्यात आली. मंदिरात फुलांची आरास करण्यात आली होती. तर विघ्नहराला रेशमी जरीचा पोशाख, सुवर्ण अलंकार परिधान करण्यात आले होते. सायंकाळी सात वाजता हरिपाठ करण्यात आला. चंद्रोदयापर्यंत कीर्तनकार ओंकार महाराज मनसुख खिल्लारवाडी यांचे हरिकीर्तन झाले. त्यास राम प्रासादिक भजनी मंडळ शिरोली यांनी साथसंगत केली. चतुर्थीचे वारकरी अन्नदान लंबोदर रवळे यांनी केले. महाआरतीच्या मानकरी ज्योती मेटे, शेखर कानडे, अनिल पठारे, विजय सातव, प्रचिती धुरी यांनी देवस्थान ट्रस्टला देणगी दिली.