पाबळ, ता. ४ : कान्हूर मेसाई (ता. शिरूर) येथील गारकोलवाडीत जुन्या वादातून युवकावर धारदार कोयत्याने हल्ला करण्यात आल्याची घटना घडली. याप्रकरणी शिक्रापूर पोलिस ठाण्यात एकावर गुन्हा दाखल करण्यात आला आहे. अभिषेक हरिभाऊ शिंदे असे गुन्हा दाखल करण्यात आलेल्याचे नाव आहे. पोलिसांनी दिलेली माहिती अशी की, कान्हूर मेसाई गावातील गारकोलवाडीत अभिषेक शरद शिंदे (वय २१) हा शाळेजवळ बसला असताना त्याच गावातील अभिषेक हरिभाऊ शिंदे याने अचानक पाठीमागून येत धारदार कोयत्याने त्याच्यावर वार केले. ‘तुला जीवे मारून टाकतो’ अशी धमकी देत त्याने सुमारे पाच-सहा वार केल्याने अभिषेक शरद शिंदे गंभीर जखमी झाला. सुदैवाने त्याचा जीव थोडक्यात बचावला आहे. यापूर्वी झालेल्या वादानंतर अभिषेक शरद शिंदे यांनी पोलिसांत तक्रार दिल्याने अभिषेक हरिभाऊ शिंदे संतापला होता. अनेकदा धमक्या दिल्यानंतर हा जीवघेणा हल्ला केला, असे फिर्यादीत नमूद आहे. याप्रकरणी अभिषेक शरद शिंदे यांनी शिक्रापूर पोलिस ठाण्यात फिर्याद दिली. पुढील तपास पोलिस करीत आहेत.