कवठे येमाई, ता. १९ : टाकळी हाजी, बेट भागातील सविंदणे, कवठे येमाई, मलठण परिसरात पुन्हा एकदा विद्युत रोहित्र चोरीची मालिका सुरू झाली असल्याने शेतकरी हैराण झाले आहेत. सविंदणे (ता. शिरूर) येथील कामठेवाडी भागातील रोहित्र चार दिवसांपूर्वी फोडून तांब्याच्या तारा चोरल्याची घटना नुकतीच उघडकीस आली. याच दरम्यान, आठ दिवसांपूर्वी मलठण येथेही चोरट्यांनी विद्युत रोहित्र फोडले होते. काही महिन्यांपूर्वी स्थानिक गुन्हे शाखा आणि शिरूर पोलिसांच्या पथकाने रोहित्र चोरट्यांच्या टोळीला गजाआड केले होते. मात्र, पुन्हा आठ दिवसांत दोन चोरीच्या घटना घडल्याने ही टोळी पुन्हा सक्रिय झाल्याची चर्चा रंगली आहे. आठवडाभरात दोन रोहित्र चोरीला गेल्याने पोलिसांची डोकेदुखी वाढली आहे. या वारंवार होणाऱ्या चोऱ्यांमुळे महावितरणवर दुरुस्तीचा अतिरिक्त आर्थिक बोजा पडत असून शेतकऱ्यांचेही मोठे नुकसान होत आहे. दरम्यान, यापूर्वी झालेल्या अनेक कृषी पंप व केबल चोरीचा तपासही अद्याप प्रलंबितच आहे. त्यातच वाढत्या चोरीच्या घटनांमुळे गुन्हे रोखण्याचे मोठे आव्हान पोलिसांसमोर उभे राहिले आहे.