शिरूर, ता. १५ : नागरिकांना ऑनलाईन सेवा देण्यासाठी लॅपटॉप व आवश्यक साधनसामग्रीचा त्वरित पुरवठा करावा, तसेच मावळ तालुक्यातील अवैध उत्खनन प्रकरणात अन्यायकारकपणे निलंबित केलेले चार तहसीलदार, चार मंडळाधिकारी व दोन ग्राम महसूल अधिकारी यांचे निलंबन तत्काळ मागे घ्यावे, या प्रमुख मागण्यांसाठी शिरूर महसूल विभागातील ग्राम महसूल अधिकारी व मंडळ अधिकारी यांनी सामूहिक रजेवर जात संप पुकारला. सोमवारी (ता. १५) सकाळी संघाच्या वतीने तहसीलदारांना मागण्यांचे निवेदन देत कामकाज बंद करण्यात आले. निवेदन तहसीलदार यांच्यावतीने महसूल नायब तहसीलदार प्रकाश मुसळे, निवडणूक नायब तहसीलदार सुजाता बारहाते व संजय गांधी नायब तहसीलदार सुवर्णा खरमाटे यांनी स्वीकारले.
यावेळी महाराष्ट्र राज्य ग्राम महसूल अधिकारी व मंडळ अधिकारी संघ शिरूरचे अध्यक्ष प्रमोद लोखंडे, सचिव विकास नरवडे, उपाध्यक्ष गुलफाम शेख, आबासाहेब रुके, दशरथ रोडे, अशोक बढेकर, संदीप ढमढेरे, हर्षद साबळे, शरद गाडे यांच्यासह तालुक्यातील ग्राम महसूल अधिकारी व मंडळाधिकारी उपस्थित होते.