पाईट, ता. १८ : येथील कुंडेश्वर येथे मागील सोमवारी (ता. ११) झालेल्या पिकअप अपघातात पापळवाडी येथील सुमारे १२ महिलांचा मृत्यू झाला व २९ महिला जखमी झाल्या होत्या. या घटनेचे गांभीर्य ध्यानात घेऊन म्हाळुंगे पोलिस ठाण्याअंतर्गत येणाऱ्या पाईट औट पोस्ट व कुंडेश्वर ट्रस्टद्वारा कुंडेश्वरकडे पाईट मार्गे जाणारा रस्ता वाघोबाचा माळ येथूनच चारचाकी वाहनांना पूर्ण बंद केला.
कुंडेश्वर मंदिराकडे जाणारा रस्ता अरुंद, तीव्र चढ उताराचा, अवघड वळणाचा आहे. त्यामुळे मोठ्या वाहनांना वळणावर टर्न घेणे अवघड आहे. दोन्ही बाजूंनी संरक्षक कठडे नसल्यामुळे अपघात होण्याची दाट शक्यता आहे. त्यामुळे सुरक्षेच्या कारणास्तव मोठी वाहने, ट्रॅक्टर, ट्रक, बस, पिकअप आणि अवजड वाहने यांना रस्ता पूर्णपणे प्रवेश बंद केला आहे. सदर मोठी चारचाकी आणि अवजड वाहने डोंगराचे पायथ्याला वाघोबाचा माळ येथे पार्किंग करून पायी जाण्याचा मार्ग वापरण्याचे आवाहन कुंडेश्वर ट्रस्टने केले आहे. वाघोबाचा माळ येथे बॅरिकेड बसविण्यात आलेले आहेत.