पाईट, ता. ९ : खेड तालुक्याच्या पश्‍चिम भागातील शिवेगाव ते वांद्रा या गावापर्यंत असणाऱ्या सुमारे २० ते २२ किमी रस्त्याची ठिकठिकाणी अत्यंत दुरवस्था झाली आहे. त्यामुळे या परिसरातील शेतकरी, गोपालक, प्रवासी, नोकरदार तरुण, महिला, शाळा व कॉलेजमध्ये जाणाऱ्या विद्यार्थ्यांना या रस्त्यावरून प्रवास व वाहन चालवणे कठीण झाले आहे.

या भागामध्ये मोठ्या प्रमाणावर दूध व्यावसायिक असून आंभु, वेल्हावळे, गाबरवाडी, गडद, कोळीये, वांद्रा व परिसरातील अनेक वाड्या-वस्त्यांवरून दूध संकलन होऊन ते पाईट येथील कात्रजच्या शीतकरण केंद्रामध्ये दररोज गोपालक यांच्यामार्फत पोहोचवले जाते, तसेच अनेक शेतकऱ्यांची शेतपिकेदेखील याच रस्त्यावरून चाकण मार्केटमध्ये नेली जातात. या परिसरातील असंख्य विद्यार्थी चाकण, पुणे, भोसरी, राजगुरुनगर येथे महाविद्यालयात शिक्षण घेत आहेत. या परिसरातून असंख्य नोकरदार तरुण चाकण एमआयडीसीमध्ये रोज ये-जा करीत आहेत. तसेच इतरही वाहतूक, वर्दळ मोठ्या प्रमाणावर आहे.
गेल्या अनेक महिन्यांपासून या रस्त्याची ठिकठिकाणी दुरवस्था झालेली असून, अनेक ठिकाणी मोठे खड्डे पडलेले आहेत तर काही ठिकाणी रस्ता उखडलेला आहे, त्यामुळे खड्ड्यांचा अंदाज न आल्याने दुचाकी अपघात होण्याची शक्यता अनेकांनी व्यक्त केली. लवकरात लवकर खड्डे बुजविण्यात यावेत, अशी मागणी होत आहे.