पाईट, ता. १४ ः आदर्श ग्रामपंचायत टेकवडी येथे मुख्यमंत्री समृद्ध पंचायत राज अभियानांतर्गत कार्यशाळेचे आयोजन करण्यात आले होते. यावेळी अभियानांतर्गत करण्यात येणाऱ्या सर्व कामांची सविस्तर माहिती सहायक गटविकास अधिकारी सुनिल भोईर यांनी दिली. तर, पंचायत विस्तार अधिकारी सुभाष भोकटे यांनी ग्रामपंचायत टेकवडीचे स्वयंमूल्यांकन तक्त्याचे वाचन करून उपस्थितांना मार्गदर्शन केले. तसेच इतर उपस्थित अधिकाऱ्यांनी ग्रामस्तरावरील वेगवेगळ्या विषयांवर मार्गदर्शन केले.
प्रत्यक्ष शिवार फेरीच्या माध्यमातून ग्रामपंचायतीने केलेल्या विविध कामांना भेटी देण्यात आल्या. तसेच, ग्रामस्तरीय समितींना अभियानांतर्गत कामांचे वाटप करून पुढील नियोजन करण्यात आले. तालुका आरोग्य विभागामार्फत टेकवडी व परिसरातील ७५ महिलांची आरोग्य तपासणीही यावेळी करण्यात आली. कार्यशाळेसाठी तालुका वैद्यकीय अधिकारी डॉ. विलास माने, मनरेगा विभागाचे तांत्रिक सहाय्यक आशिष तायडे, सरपंच विठ्ठल शिंदे, उपसरपंच ज्ञानेश्वर बेंडुरे, गणपत बेंडुरे, नवनाथ भालेराव, स्वप्निल येवले, दत्तात्रय शिर्के, शंकर जाचक, ज्ञानेश्वर पवार, सीमा ससाणे, ग्रामसेवक मधुकर दवणे व ग्रामस्थ उपस्थित होते. सरपंच शिंदे यांनी उपस्थित अधिकारी वर्गाचे आभार मानले.