पाईट, ता. २१ ः श्रीशिव प्रतिष्ठान हिंदुस्थान आणि श्रीशिवभक्त प्रतिष्ठान, पाईटचे सदस्य व समस्त ग्रामस्थांच्या सहभागातून पाईट येथील सर्व मंदिरांमध्ये दिवाळीनिमित्त दिप महोत्सव साजरा करण्यात आला. या दिप महोत्सवाचे हे तिसरे वर्ष आहे. यामध्ये वसुबारस या दिवशी राममंदिर, धनत्रयोदशीला मारूती मंदिर, नरकचतुर्दशीला अमृतेश्वर मंदिर, लक्ष्मीपूजन दिवशी श्रीनवखंडेनाथ मंदिरात सायंकाळी ११०० पणत्या लावण्यात आल्या. या पणत्यांच्या प्रकाशात पाईट गावातील मंदिरे व परिसर न्हाऊन निघाला होता. ही पणत्यांची आरास पाहण्यासाठी ग्रामस्थांनी गर्दी केली होती. दीपावली पाडव्यादिनी कुंडेश्वर मंदिर परिसरात असाच पणत्यांचा लखलखाट करण्यात येणार असल्याचे तरुणांनी संगितले. गावातील तरुणांनी गेली तीन वर्षे राबवलेल्या या उपक्रमाचे परिसरातून कौतुक होत आहे.