अविनाश घोलप
फुलवडे : बालपणापासून जीवनाच्या प्रत्येक टप्प्यावर संघर्षांचा सामना करणाऱ्या सुरेश हुले यांनी आपल्या जिद्दीने आणि प्रयत्नांनी अपंगतेला मात दिली आणि शिक्षण क्षेत्रात आदर्श शिक्षक म्हणून नाव कमावले.
बालपणापासून जन्मजात अस्थिव्यंगतेने ग्रासलेले नारोडी (ता. आंबेगाव) येथील सुरेश तुकाराम हुले (वय ५५) यांनी शिक्षणासाठी अपार संघर्ष केला. गावातील जिल्हा परिषद शाळेत जाण्यास सुरुवातीला भावाने खांद्यावर उचलून नेले, नंतर काठीचा आधार घेऊन स्वतः प्रयत्न केला. आईवडील व कुटुंबाच्या पाठिंब्यामुळे त्यांनी शिक्षणात लक्ष केंद्रित केले. आर्थिक परिस्थितीला तोंड देत ‘कमवा व शिका’ योजनेतून कॉलेजचे शिक्षण पूर्ण केले. अधू पायावर होणाऱ्या उपचारांनंतरही जीवनातल्या मानसिक आणि शारीरिक ताणावर मात करत त्यांनी पदव्या प्राप्त केल्या. बीएड नंतर रोजगारासाठी अनेक परीक्षा दिल्या, अखेर आदिवासी विकास विभागाच्या आश्रमशाळेत शिक्षक व नंतर मुख्याधापक म्हणून काम करत आहेत. शिक्षणाच्या जोरावर आर्थिक स्वावलंबन मिळविल्यानंतर, समाजातील दुर्बल घटकांना मदत करण्यासाठी सुरेश हुले नेहमीच पुढाकार घेतात. अंधश्रद्धा आणि निरक्षरतेविरुद्ध त्यांनी मोहीम राबवली. तांत्रिक साधनांचा वापर करत मोबाइल ॲप व वॉकरच्या साहाय्याने त्यांनी शिक्षण क्षेत्रात नवे प्रयोग केले आहेत. सुरेश हुले म्हणतात, ‘‘कोणत्याही क्षेत्रात यश मिळवायचे असेल तर कष्ट करावेच लागतात. वाचन, मनन आणि चिंतन हे यशस्वी जीवनाचे मुख्य मंत्र आहेत.’’

4680