पिंपळवंडी, ता.२७ : येथील वाघपट्टा शिवारातील शेतकरी मयूर वाघ यांची कालवड बिबट्याने हल्ला करून तिला गंभीर जखमी केले. ही घटना शुक्रवारी (ता.२६) संध्याकाळी साडेपाच वाजण्याच्या सुमारास घडली.
वाघ हे त्यांच्या घराच्या ओट्यावर बसले असता तेथे बाजूला बांधलेल्या कालवडीवर बिबट्याने अचानक हल्ला केला. तिच्या मानेला पकडले. त्यांनी मोठ्याने आरडाओरडा केला असता बिबट्याने तेथून पळ काढला.या हल्ल्यात कालवड गंभीररीत्या जखमी झाली आहे. घटनेची माहिती वनविभागाला कळवली असता वनविभागाचे वनपाल अनिल सोनवणे यांनी शनिवारी सकाळी घटनास्थळी येऊन पंचनामा केला.
वाघ यांनी सांगितले की, आम्हाला दिवसा दररोज बिबट्याचे दर्शन होत असते. या परिसरात पिंजरे लावले असताना देखील बिबटे त्या पिंजऱ्यात जेरबंद होत नाहीत.
बिबट्यांच्या हल्ल्यांचे सत्र असेच सुरू राहिले तर आम्ही घराबाहेर पडायचे की नाही? यावर कायमस्वरूपी उपाययोजना करणे गरजेचे आहे.