पिंपळवंडी, ता. ५ : काळवाडी (ता.जुन्नर) परिसरात ऊसतोड सुरू असताना बुधवारी (ता.४) दुपारी ऊसतोड मजुरावर बिबट्याने हल्ला केला व त्याला जखमी केले.
शांताराम दामू भील (मूळ रा. जामनेर, जि. जळगाव) हा ऊस तोडायचे काम करत होता. त्यावेळी अचानक बिबट्याने त्याच्यावर झडप घातली. बिबट्याचा पंजा लागल्याने तो गंभीर जखमी झाला आहे. दरम्यान, शेजारील मजुरांनी आरडाओरडा केल्याने बिबट्याने तेथून पळ काढला.
घटनेची माहिती वनविभागाला कळविल्यानंतर वनविभागाचे कर्मचारी घटनास्थळी दाखल झाले. बिबट्याच्या हल्ल्यात जखमी झालेले शांतारामला वनविभागाच्या कर्मचाऱ्यांनी नारायणगाव येथील प्राथमिक आरोग्य केंद्रात उपचारासाठी नेले. बिबट्याच्या भीतीच्या सावटाखाली येथील शेतकरी व नागरिक जीवन जगत असून, यावर लवकरात लवकर कायमस्वरूपी उपाय होणे गरजेचे आहे. ओतूर वनपरिक्षेत्र अधिकारी चैतन्य कांबळे यांनी सांगितले की, ऊसतोड कामगार व शेतमजूर यांनी शेतात काम करत असताना सतत जागरूक राहणे गरजेचे आहे.