शिरूर, ता. २२ : तर्डोबाची वाडी (ता. शिरूर) येथून शुक्रवारपासून (ता. १९) बेपत्ता असलेल्या माधुरी ऊर्फ सोनाली सिद्धेश्वर जगदाळे (वय ३२, रा. मुक्ताबाई नगर, तर्डोबाची वाडी) यांचा मृतदेह भैरवनाथ मंदिराजवळ घोड नदीच्या पात्रात आढळला.
माधुरी या बेपत्ता झाल्याबाबत त्यांचे पती सिद्धेश्वर संजय जगदाळे यांनी दोन दिवसांपूर्वी शिरूर पोलिसांना कळविले होते. शुक्रवारी सकाळी घरासमोर आलेल्या कचरा गाडीत कचरा टाकण्यासाठी घरातून बाहेर पडलेल्या माधुरी या बेपत्ता झाल्याने त्यांचे पती व नातेवाइकांनी परिसरात शोध घेतला. मात्र, दुपारपर्यंत त्यांचा ठावठिकाणा न लागल्याने पोलिसांना कळविण्यात आले. पोलिसांनी सद्यःस्थितीत अकस्मात मृत्यूची नोंद केली असून, तपासानंतर पुढील गुन्हा दाखल केला जाईल, असे या प्रकरणाचा तपास करणारे पोलिस उपनिरीक्षक गोविंद खटींग यांनी सांगितले.