पिरंगुट, ता. २४ : पुणे ग्रँड चॅलेंज टूर या स्पर्धेसाठीच्या मुळशीतील रस्त्यांच्या कामांना स्वतंत्र निधी उपलब्ध झाला आहे. याबाबत तालुका भाजप युवा मोर्चाचे कार्याध्यक्ष सागर मारणे यांनी सांगितले की, पंतप्रधान नरेंद्र मोदी यांच्या खेलो इंडिया या संकल्पनेतून व मुख्यमंत्री देवेंद्र फडणवीस यांच्या मार्गदर्शनाखाली ऑलिंपिक दर्जाची पुणे ग्रँड चॅलेंज टूर ही आंतरराष्ट्रीय सायकल स्पर्धा जानेवारी २०२६ मध्ये आयोजित केली आहे. या स्पर्धेच्या निमित्ताने जगभरातील सुमारे ५० देशांतील सायकलपटू स्पर्धेमध्ये सहभागी होणार आहेत. त्यासाठी भोर, राजगड, मुळशी आदी भागामध्ये सायकल ट्रॅकची निर्मिती केली जाणार आहे. त्यासाठी तेथील रस्ते चांगल्या दर्जाचे निर्माण केले जाणार आहेत. त्याअंतर्गत भोर-राजगड-मुळशी विधानसभेकरीता १२१ कोटीचे रस्ते विकासासाठी निधी मंजूर केला गेला आहे. मुळशीतील पिरंगुट, घोटावडे माण हिंजवडी, मारुंजी, कासारसाई, पौड, करमोळी, चाले, कोळवण, हाडशी, काशिग, दारवली, अंबडवेट, भरे आदी भागातून जाणाऱ्या रस्त्यांचा त्यात समावेश आहे. या रस्त्याच्या उद्‍घाटनासाठी स्वतः फडणवीस यांनी येण्याचे आश्वासन दिले आहे.