पिरंगुट, ता. १२ : लवळे (ता. मुळशी) येथील ग्रामदैवत श्री काळभैरवनाथ जयंती विविध उपक्रमांनी उत्साहात व भक्तिमय वातावरणात साजरी करण्यात आली. त्यानिमित्त मंदिरातील गाभाऱ्याला आकर्षक फुलांची सजावट केली होती. मंदिराला विद्युत रोषणाई केली होती. काळभैरवनाथ देवाच्या वाढदिवसानिमित्त पहाटेपासून देवाला अभिषेक केला. त्यानंतर सत्यनारायण महापूजा व होम पार पडला. संध्याकाळी हरिपाठ व भजनाचा कार्यक्रम झाला. सायली देशमुख महाराज यांचे कीर्तन झाले. कार्यक्रमाचे संयोजन ग्रामस्थ व आरती मंडळाने केले होते.