पौड, ता. ४ : पौड (ता. मुळशी) येथील तहसील कचेरीतील ‘एक खिडकी’ योजनेच्या कार्यालयात मुळशी तालुक्यातील शाळा महाविद्यालयातील विद्यार्थ्यांना महसूल खात्यातून विविध प्रकारचे दाखले काढण्यासाठी स्वतंत्रपणे विद्यार्थी मदत कक्ष सुरू केला आहे.
आमदार शंकर मांडेकर यांचे प्रयत्न आणि पाठपुराव्याने सुरू झालेल्या या कक्षामुळे आता विद्यार्थ्यांना दाखले घेण्यासाठी रांगेत उभे राहण्याची गरज पडणार नाही. विद्यार्थ्यांना विविध ठिकाणी प्रवेश घेण्यासाठी, सरकारच्या विविध योजनांचा लाभ घेण्यासाठी अनेक प्रकारच्या दाखल्यांची आवश्यकता असते. जातीचा दाखला, रहिवासी दाखला, डोमासाईल, उत्पन्नाचा, डोंगरी असल्याचा अशा विविध प्रकारचे दाखले काढण्यासाठी विद्यार्थ्यांना तहसील कचेरीत अर्ज करावा लागतो. मात्र, तहसील कचेरीतील एक खिडकी योजनेच्या कार्यालयात विविध महसूली कामांसाठी तालुक्याच्या कानाकोपऱ्यातून नागरिक येत असतात. कार्यालयाची इमारतही छोटी असल्याने त्यात विविध प्रकारचे अभिलेख मिळविण्यासाठी नागरिकांची तोबा गर्दी असते.
या गर्दीत विद्यार्थ्यांना उभे राहावे लागत होते. त्यामुळे त्यांच्या शाळा बुडत होत्या. त्याचप्रमाणे महसूली कागदपत्रे मिळविण्यासाठी अर्जांचे ढीग लागत असल्याने विद्यार्थ्यांना वेळेवर दाखले मिळत नव्हते. परिणामी काही विद्यार्थ्यांना प्रवेशापासून, तसेच काहींना सरकारी योजनेचा लाभ मिळण्यापासून वंचित राहण्याचा फटका सहन करावा लागत होता. दहावी, बारावीचा निकाल लागल्यानंतर तर तहसील कचेरीत विद्यार्थ्यांची गर्दी होत होती. ही बाब आमदार मांडेकर यांच्या लक्षात आली. त्यामुळे त्यांनी खास विद्यार्थ्यांसाठी एक खिडकी कार्यालयात स्वतंत्र कक्ष सुरू करण्याचा विचार तहसीलदारांपुढे मांडला. तहसीलदारांनीही त्यास हिरवा कंदील दाखविला.
महसूल विभागातील अधिकारी, कर्मचारी यांनीही विद्यार्थ्यांच्या महसूल विषयक अडीअडचणी सोडविण्यासाठी, तसेच वेळेपूर्वी दाखले देण्यासाठी विशेष सहकार्य करावे, असे आवाहन आमदार मांडेकर यांनी केले आहे.