राहू, ता. १६ : पावसाच्या हलक्या सरी झेलत राहू बेट, खामगाव, पिंपळगाव (ता. दौंड) परिसरात स्वातंत्र्य दिन मोठ्या उत्साहात साजरा झाला. यानिमित्त शाळांमध्ये सांस्कृतिक कार्यक्रमांचे आयोजन केले होते. गुणवंतांना सन्मानपत्र देऊन गौरविण्यात आले.
राहू येथील कैलास विद्या मंदिर व जिल्हा परिषद प्राथमिक केंद्र शाळेत विद्यार्थ्यांसाठी विविध स्पर्धा घेण्यात आल्या. विशेष प्राविण्य मिळविणाऱ्या गुणवंत विद्यार्थ्यांना सन्मानित केले. विद्यार्थ्यांनी विविध कलागुण सादर केले. इयत्ता दहावी, बारावी, विविध स्पर्धा परीक्षेतील गुणवंतांचा विशेष सन्मान करण्यात आला. राहू ग्रामपंचायतीचे ध्वजवंदन सरपंच दिलीप देशमुख यांच्या हस्ते झाले. कैलास विद्या मंदिर, जिल्हा परिषद प्राथमिक केंद्र शाळेतील ध्वजवंदन मेजर महेश आदक यांच्या हस्ते करण्यात आले. तसेच, टाकळी भीमा, पिलाणवाडी, टेळेवाडी, वाळकी कोरेगाव, भिवर, वडगाव बांडे आदी गावांमधील ध्वजवंदन तेथील सरपंचांच्या हस्ते केले. स्वातंत्र्यदिनानिमित्त या गावांमध्ये विविध सांस्कृतिक कार्यक्रमांचे आयोजन केले होते.