राहू, ता. १७ : पाटेठाण (ता. दौंड) : येथील श्रीनाथ म्हस्कोबा साखर कारखान्याच्या वतीने सभासद आणि ऊस पुरवठादार शेतकऱ्यांना १४ ते २० ऑक्टोबर दरम्यान साखर वाटप करण्यात येत आहे.
कारखान्याच्या कार्यक्षेत्रातील संबंधित शेतकी गटकार्यालयामध्ये २० रुपये किलो सवलतीच्या दरात पाच, दहा, वीस, पंचवीस, पन्नास किलोच्या आकर्षक पॅकिंगमध्ये साखर वाटप सुरू असल्याची माहिती कारखान्याचे अध्यक्ष पांडुरंग राऊत व कार्याध्यक्ष अॅड. विकास रासकर, मुख्यकार्यकारी अधिकारी डी. एम. रासकर यांनी दिली. साखर घेऊन जाण्याचे आवाहन कारखान्याच्या वतीने करण्यात आले.
कारखान्याच्या धोरणानुसार हडपसर, राहू, पारगाव, खामगाव, रांजणगाव, अष्टापूर फाटा, तळेगाव ढमढेरे, शिक्रापूर येथील शेतकी गटांमधून साखर वाटप सुरू आहे. यावेळी शेतकी अधिकारी भाऊसाहेब फडतरे, बापूराव शेलार, किसन कदम, सुभाष टेळे, दीपक डुबे, नितीन शिंदे यांच्यासह सभासद व शेतकरी उपस्थित होते.
चालू हंगामात कारखान्याच्या वतीने नऊ लाख टन गाळपाचे उद्दिष्ट ठेवले असून, त्या दृष्टीने यंत्रणा सज्ज झाली असल्याची माहिती कारखाना प्रशासनाच्या वतीने देण्यात आली.

03490