राजगुरुनगर, ता. २२ : प्रतिबंधात्मक आदेश असतानाही वाडा (ता. खेड) गावात बैलपोळा सणानिमित्त मिरवणूक काढत ऑर्केस्ट्रा लावून नृत्यांगना नाचविल्याप्रकरणी खेड पोलिस ठाण्यात सहा जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फौजदार बाळकृष्ण बुधाजी साबळे यांनी याप्रकरणी फिर्याद दिली आहे. पुणे ग्रामीण जिल्हाधिकाऱ्यांनी शुक्रवारपासून (ता. १९) गुरुवारपर्यंत (ता. २) जिल्ह्यात प्रतिबंधात्मक आदेश जारी केला आहे. तरीही येथील धर्मराज बैलगाडा संघटना आणि दहशत किंग गुज्जर बैलगाडा संघटना यांनी परवानगी न घेता, रविवारी (ता. २१) सकाळी वाडा गावातील दत्त मंदिरापासून ग्रामपंचायत कार्यालयापर्यंत बैलांची मिरवणूक काढली.‌ तसेच, ट्रॅक्टरवर लाकडी स्टेज बनवून ऑर्केस्ट्रा लावला आणि नृत्यांगना नाचवल्या. याप्रकरणी पोलिसांनी जिग्नेश गोपाळे (रा. चिखलगाव, ता. खेड), रवी रामदास हुंडारे, रा. वाडा, ता. खेड), सोन्या उल्हास हुंडारे (रा. वाडा, ता. खेड), संकेत माळी (रा. वाडा, ता. खेड), योगेश केदारी (रा. सुरकुंडी, ता. खेड), शंकर राजाराम माळी (रा. वाडा, ता. खेड) या सहा जणांवर गुन्हा दाखल केला.