राजगुरुनगर, ता. १५ : खेड तालुक्यातील भोरगिरी येथील भोरगडावर ट्रेकिंगसाठी आलेल्या तरुण पर्यटकाचा आकस्मिक मृत्यू झाल्याची घटना रविवारी (ता. १४) दुपारी अडीच वाजण्याच्या सुमारास घडली. ओंकार देविदास लोहार (वय २१, रा. हडपसर), असे मृताचे नाव आहे.
हडपसर येथील पर्यटकांचा ३० जणांचा महिला व पुरुषांचा एक गट भोरगिरी येथे ट्रेकिंगसाठी रविवारी पहाटे दाखल झाला. सकाळी साडेसात वाजता हे पर्यटक भोरगड किल्ल्यावर चढले. किल्ल्यावर जाऊन त्यांनी त्याठिकाणी साफसफाई केली. दुपारी अडीच वाजण्याच्या सुमारस ते किल्ल्यावरून खाली उतरले. पायथ्याशी असलेल्या ओढ्यावर ते हातपाय धूत असताना त्यांच्या गटातील ओंकार लोहार हा तरुण शुद्ध हरपून अचानक पाण्यात कोसळला. त्यास उमेश भालेराव व नीलेश चव्हाण या सहकाऱ्यांनी पाण्यातून बाहेर काढले. त्यांनी त्याला प्रथम वाडा येथील खासगी रुग्णालयात नेले. तेथील डॉक्टरांनी तपासून त्याला पुढील उपचारांसाठी राजगुरुनगरला जाण्यास सांगितले. त्यानुसार ते त्याला चांडोली येथील ग्रामीण रुग्णालयात घेऊन गेले. मात्र, तेथील डॉक्टरांनी तपासून त्यास मृत घोषित केले.
या घटनेची खबर त्यांच्या बरोबर असलेले अनिल महादेव सावंत यांनी खेड पोलिस ठाण्यात दिली. पोलिसांनी आकस्मिक मृत्यूची नोंद केली.‌
या पर्यटकाच्या मृत्युमुळे गटातील सहकारी दुःखात बुडाले. त्यांच्या ट्रेकिंग गटामध्ये मृत ओंकार याची बहिणही सहभागी होती. त्यामुळे दुःखाची छाया अधिकच गडद झाली.