राजगुरुनगर, ता. १५ : खेड तालुका जिल्हा परिषद, पंचायत समिती निवडणुकीसाठी प्रशासकीय यंत्रणा सज्ज झाली आहे. आदर्श आचारसंहिता लागू झाली असून, भरारी पथकेही बनविण्यात आली आहेत, अशी माहिती खेडचे उपविभागीय अधिकारी सुनील दौंडे आणि तहसीलदार प्रशांत बेडसे यांनी दिली.
या निवडणुकीसाठी उपविभागीय अधिकारी सुनील दौंडे हे निवडणूक निर्णय अधिकारी असून, तहसीलदार प्रशांत बेडसे हे सहायक निवडणूक निर्णय अधिकारी आहेत. सुमारे २ हजार मतदान अधिकारी व कर्मचाऱ्यांच्या नियुक्त्या केल्या आहेत. राजकीय पक्ष, पोलिस अधिकारी, प्रशासकीय अधिकारी आदींच्या बैठका पार पडल्या आहेत. उमेदवारी अर्ज प्रत्यक्षपणे सादर करायचे आहेत. खेड उपविभागीय अधिकारी कार्यालयात अर्ज मिळणार आहेत आणि त्याठिकाणीच स्वीकारले जाणार आहेत. स्वतः उमेदवाराने किंवा सूचकाने अर्ज दाखल करावयाचा आहे, असे त्यांनी सांगितले.
निवडणूक प्रक्रिया पारदर्शक, निर्भय, सुलभतेने पार पाडण्यासाठी प्रशासन सज्ज झाले असून आदर्श आचारसंहिता लागू झाली आहे. सर्व शासकीय इमारतींवरील राजकीय व्यक्ती व पक्षांचे फलक, फ्लेक्स, जाहिराती, नेतेमंडळीचे फोटो झाकण्याच्या सूचना संबंधित अधिकाऱ्यांना दिल्या आहेत. मतदार संघात फिरती सर्वेक्षण पथके, व्हिडिओ सर्वेक्षण पथके, व्हिडिओ दक्षता पथके तयार करण्यात आली आहेत. स्थिर सर्वेक्षण पथकेही बनविण्यात आली आहेत, असे त्यांनी सांगितले.