राजेगाव, ता. २४ : राजेगाव (ता. दौंड) येथून श्री राजेश्वर प्रासादिक दिंडी सोहळ्याचे ज्ञानोबा माऊली तुकारामाचा जयघोषात भक्तीमय वातावरण, पावसाच्या झरी झेलत पंढरपूरच्या दिशेने प्रस्थान झाले.
अमावस्या मुहूर्तावर दरवर्षी या दिंडीचे प्रस्थान होते. या दिंडी सोहळ्यात राजेगाव पंचक्रोशीतील वारकरी सहभागी झाले आहेत. दिंडी सोहळ्याचे हे चोविसावे वर्षे आहे. प्रतिपंढरपूर समजल्या जाणाऱ्या भीमानदीतीरावर असणाऱ्या जुने राजेगाव येथील राजेश्वर महाराज मंदिर आणि विठ्ठल रुक्मिणी मंदिराजवळ पंचक्रोशीतील वारकरी जमा होऊ लागले. ज्ञानोबा माऊली तुकारामाचा जयघोषात वारकऱ्यांनी भजन केले. नंतर प्रसाद घेऊन सोहळा नव्या गावातील मंदिरात विसावला. तेथे भजन करून वैष्णवांचा मेळा भिगवणच्या दिशेने निघाला. आबा टेंगले, रायचंद टेंगले आणि विशाल थोरात यांनी पालखीसाठी महाप्रसादाचे आयोजन केले होते.
या दिंडी सोहळ्याचे नियोजन लक्ष्मण महाराज जगदाळे, अशोक मोरे, शिवाजी तोरडमल, भाऊसाहेब बाबर, सर्जेराव मेंगावडे, हनुमंत बगाडे, लाला परदेशी, राजेंद्र पांडव, राजेंद्र थोरात, रायचंद टेंगले आदींनी केले आहे.
भंडी शेगाव (ता. पंढरपूर) येथे या पालखीला राजेगावचे शहाजीबापू जाधव आणि महादेव बगाडे यांच्या वतीने अन्नदान केले आहे. भिगवणला हा दिंडी सोहळा ८० वर्षांची जुनी परंपरा लाभलेल्या आणि तीन-चार हजार वैष्णव सहभागी असलेल्या चौरंगीनाथ पालखी सोहळ्यात विलीन होऊन पंढरपूरकडे प्रस्थान करणार आहे.