इंदापूर, ता. १० : अकलूजवरून इंदापूरमार्गे पुण्याला निघालेल्या एका महिलेच्या पर्समधील तब्बल आठ लाख रुपयांच्या सोन्याच्या दागिन्यांची व रोख रकमेची चोरी झाल्याची घटना आठ दिवसांपूर्वी इंदापूर येथील घडली.
अलका वसंत बनकर (वय ५९, रा. अकलूज, ता. माळशिरस, जि. सोलापूर) या २ मार्च रोजी आपले पती वसंतराव बनकर यांच्यासह अकलूजवरून इंदापूर येथे आल्या. इंदापूर येथून बस बदलून पुण्याच्या दिशेने जाणाऱ्या बसमध्ये चढत असताना झालेल्या गर्दीचा गैरफायदा घेऊन पर्समध्ये ठेवलेले सोन्याचे गंठण, मिनी गंठण, बांगड्या, नेकलेस, अंगठ्या, जुबे व कानातील सोन्याचे टॉप्स (किंमत ७ लाख ८० हजार रुपये व रोख रक्कम २४ हजार रुपये) असा एकूण ८ लाख ४ हजार रुपयांचा मुद्देमाल चोरट्याने लंपास केला. यावरून इंदापूर पोलिस ठाणे येथे अज्ञात चोरट्याविरोधात गुन्हा दाखल केला.