शेटफळगढे, ता. १३ : शेटफळगढे (ता. इंदापूर) येथे सलग दुसऱ्याच दिवशी झालेल्या अपघातात मोटार सायकलस्वराचा मृत्यू झाला.
शेटफळगढे येथील भिगवण- बारामती रस्त्यावरील हॉटेल तुळजाभवानीसमोर शनिवारी (ता. १३ रोजी) सायंकाळी साधारण सव्वासात वाजता संतोष नारायण हिरवे (वय ५१, रा. शारदनगर, तांदुळवाडी, ता. बारामती) हे त्यांचे हिरो होंडा स्प्लेंडर प्लस दुचाकीवरून भिगवण बाजूने बारामतीला जात होते. त्यावेळी निरगुडे फाट्याजवळ हॉटेल तुळजाभवानी समोर ऊस वाहतूक करणारा ट्रॅक्टर व मोटरसायकलमध्ये अपघात होऊन हिरवे यांचा मृत्यू झाला.
भिगवण- बारामती रस्त्यावर वेगवेगळे अपघात होत आहेत. शुक्रवारी (ता. १२) अपघात होऊन एक मोटरसायकल चालकाचा मृत्यू झाला होता. त्यानंतर शनिवारीदेखील ऊस वाहतूक करणारा ट्रॅक्टर व मोटरसायकल यांचा अपघात होऊन त्यात मोटरसायकल चालकाचा मृत्यू झाला. तर दुपारच्या वेळेस भिगवण रस्त्यावरील कोठारी फार्मजवळ देखील दोन मोटरसायकलमध्ये किरकोळ अपघात होऊन एक मोटरसायकल चालक जखमी झाला आहे. गेल्या काही दिवसांपूर्वी पिंपळे हद्दीत ट्रक आणि ट्रॅक्टर यांचा अपघात होऊन ट्रॅक्टर चालक मृत्यु झाला होता. त्यामुळे गेल्या काही दिवसांपासून भिगवण बारामती रस्त्यावर अपघाताचे सत्र सुरूच आहे.