सासवड, ता. ११ : सासवड (ता. पुरंदर) येथील कऱ्हा आणि चांबळी नदीच्या पवित्र संगमावर वसलेल्या पुरातन श्री संगमेश्‍वर मंदिरात तिसऱ्या श्रावणी सोमवारनिमित्त भाविकांनी मोठ्या संख्येने गर्दी केली होती. संपूर्ण परिसर ‘ओम नमः शिवाय’च्या जयघोषाने दुमदुमून गेला होता.
श्री संगमेश्वर सुधार समिती आणि स्थानिक भाविकांनी दिवसभर धार्मिक कार्यक्रमांचे आयोजन केले होते. पहाटे रुद्राभिषेक, सकाळी दैनंदिन पूजा, संध्याकाळी आरती, रात्री विशेष पूजा व महाआरती करण्यात आली.

श्री काळभैरवनाथ देवस्थान ट्रस्टचे अध्यक्ष रमेश जगताप यांच्यावतीने केळी वाटप, तर संदीप जगताप, विशाल जगताप, सुमीत पवार आणि तेजस राऊत यांनी खिचडीचे वाटप केले. तसेच, श्री संगमेश्वर सुधार समिती आणि एकनाथ थोरात मित्र परिवाराच्या वतीने भंडाऱ्याचे आयोजन केले. दिवसभरात हजारो भाविकांनी श्री संगमेश्वर शिवलिंगाचे दर्शन घेतले, अशी माहिती सुधार समितीच्या वतीने देण्यात आली.

मंदिरासमोरील समस्यांकडे दुर्लक्ष
एकीकडे भाविकांचा उत्साह असतानाच, मंदिरासमोरील काही समस्यांकडे दुर्लक्ष होत असल्याची खंतही व्यक्त केली. मंदिरासमोर नदीच्या पाण्यात मोठ्या प्रमाणात जलपर्णी वाढली आहे, ज्यामुळे मंदिराच्या सौंदर्याला बाधा येत आहे. तसेच, भाविकांच्या सोयीसाठी स्वच्छतागृहाची मागणी चार महिन्यांपासून नगरपरिषदेकडे करण्यात येत आहे. मात्र, या मागणीकडे पालिका प्रशासन दुर्लक्ष करत असल्याचे संगमेश्वर सुधार समितीने म्हटले आहे.