​सासवड, ता. ५ : संत ज्ञानेश्‍वर महाराजांचे धाकटे बंधू संत सोपानकाका महाराजांचा जन्मोत्सव त्रिपुरारी पौर्णिमेच्या दिवशी सासवड नगरीतील त्यांच्या समाधी मंदिरात साजरा करण्यात आला. याप्रसंगी हरिनामाचा जयघोष आणि पुष्पवृष्टी करण्यात आली.
​जन्मोत्सवाच्या निमित्ताने पहाटेपासून मंदिरात सर्व धार्मिक विधी झाले. यानंतर वीणामंडपात सकाळी ९ ते ११ या वेळेत पुणे येथील कीर्तनकार संदीप महाराज वैद्य यांचे जन्मोत्सवाचे कीर्तन झाले. कीर्तनानंतर हरिनामाच्या जयघोषात सोपानकाका महाराजांचा जन्मोत्सव साजरा करण्यात आला.
​यावेळी महिलांनी पारंपरिक पद्धतीने पाळणा गायन करून आनंद व्यक्त केला. त्यानंतर पुष्पवृष्टी आणि आरती करण्यात आली, तर भिवडी ग्रामस्थांच्या वतीने महाप्रसादाचे आयोजन केले होते.
त्रीपुरारी पौर्णिमा आणि संत सोपानकाका महाराज ​जन्मोत्सवानिमित्त मंदिरात सायंकाळी संत सोपानकाका सहकारी बँकेच्या वतीने पणत्या लावून दीपोत्सव साजरा केला. पणत्यांनी उजळलेले सोपानकाका महाराजांचे मंदिर लक्ष वेधून घेत होते. देवस्थानचे मधुकाका गोसावी, चोपदार सिद्धेश शिंदे यांसह अनेक ग्रामस्थ उपस्थित होते. मुख्य विश्‍वस्त त्रिगुण महाराज गोसावी आणि व्यवस्थापक हिरुकाका गोसावी यांनी ही माहिती दिली.