सासवड, ता. १७ : संत सोपानकाका महाराज यांच्या सासवड (ता. पुरंदर) येथील समाधी मंदिरात बुधवारी (ता. १७) मार्गशीर्ष वद्य त्रयोदशी संत सोपानकाका महाराजांचा ७२९ वा संजीवन समाधी दिन सोहळा साजरा झाला. यावेळी संत नामदेव महाराजांचे वंशज केशव महाराज नामदास यांचे कीर्तन झाले. याप्रसंगी हजारो भाविकांनी पुष्पवृष्टी करीत केलेल्या हरिनामाच्या जयघोषाने मंदिर परिसर दुमदुमून गेला होता.
संत सोपानकाका महाराजांचा समाधी उत्सव शुक्रवारपासून (ता. १२) शुक्रवार(ता. १९)पर्यंत सासवडमध्ये सुरू आहे. मार्गशीर्ष वद्य त्रयोदशी या समाधी दिन सोहळ्यानिमित्त केशव महाराज नामदास यांनी वीणा मंडपात समाधी वर्णनाचे कीर्तन सांगून उपस्थितांपुढे समाधी सोहळ्याचा प्रसंग उभा केला. याप्रसंगी राज्यातून आलेले भाविक तसेच दिंड्यांतील वारकरी उपस्थित होते.
सायंकाळी देवस्थानतर्फे प्रवचन, महिन्याचे वारकऱ्यांचे भजन, हरिपाठ, रात्री समाधी वर्णनाचे अभंग, मंदिर प्रदक्षिणा, बाळकृष्णबुवा दिंडीचा जागर झाला. गुरुवारी (ता. १८) सकाळी भोपळे दिंडीतर्फे काल्याचे कीर्तन, दहीहंडी आणि दिंडी प्रदक्षिणा, सोहळ्याच्या अखेरच्या दिवशी सकाळी म्हस्कूजी महाराज कामठे यांचे कीर्तन सकाळी ११.३० ते १२ पर्यंत संत सोपानदेव यांच्या समाधीच्या प्रक्षाळ पूजेने उत्सवाची सांगता होणार असल्याची माहिती अॅड. त्रिगुण गोसावी यांनी दिली.
आळंदी देवस्थानतर्फे विश्‍वस्त पुरुषोत्तम महाराज पाटील, विश्‍वस्त रोहिणी पवार, बाळासाहेब आरफळकर, राजाभाऊ चोपदार, सार्थक चोपदार, मुक्ताई देवस्थानतर्फे संदीप महाराज पाटील, देहू देवस्थान विश्‍वस्त माणिक महाराज मोरे, पंढरपूर देवस्थान विश्‍वस्त अॅड. माधवी निगडे, हिरूकाका गोसावी, श्रीकांत गोसावी, चोपदार सिद्धेश शिंदे आदी उपस्थित होते.