तळेगाव ढमढेरे, ता.२६: राज्यातील शेतकऱ्यांची सरसकट कर्जमाफी करून सातबारा कोरा करावा, सरकारने वेळ काढूपणा करू नये या मागणीसाठी पुण्याच्या जिल्हाधिकारी कार्यालयासमोर राष्ट्रीय समाज पक्षातर्फे एक दिवशीय धरणे आंदोलन करण्यात आले. यावेळी शेतकऱ्यांसह पक्षाच्या पदाधिकाऱ्यांनी जिल्हाधिकारी जितेंद्र डुडी यांना मागण्यांचे निवेदन दिले.
यावेळी राष्ट्रीय समाज पक्षाचे जिल्हाध्यक्ष तानाजी शिंगाडे, प्रदेश सदस्य सुनिता किरवे, बाळासाहेब कोकरे, सरचिटणीस अजित पाटील, संदीप चोपडे, विनायक रूपनवर, किरण गोफणे, नवनाथ कोळेकर, संजय निगडे, अमोल सातकर, परमेश्वर बुरले, अंकुश देवडकर, वैशाली जाधव, प्रशांत रूपनवर, चेतना पिंगळे आदी राष्ट्रीय समाज पक्षाच्या पुणे जिल्ह्यातील पदाधिकाऱ्यांच्या निवेदनावर स्वाक्षरी आहेत.
शेतकऱ्यांना हंगामामध्ये शेतमजुरांना जास्त मजुरी द्यावी लागत असल्याने शेती करणे परवडत नाही. शेतमालाला पुरेसा बाजारभाव मिळत नाही त्यामुळे शेतकरी कर्जबाजारी होऊन आत्महत्यांचे प्रमाण वाढतच चालले आहे. राज्यातील महायुती सरकारने शेतकऱ्यांची सरसकट कर्जमाफी करून शेतकऱ्यांचा सातबारा कोरा करावा. शेतकऱ्यांच्या कर्जमाफीसाठी प्रशासनाने दिरंगाई करू नये अन्यथा आगामी काळात राष्ट्रीय समाज पक्षातर्फे राष्ट्रीय अध्यक्ष महादेव जानकर यांच्या मार्गदर्शनाखाली तीव्र आंदोलन करण्यात येईल असा इशारा निवेदनात दिला आहे.

07647