तळेगाव ढमढेरे, ता. २९ :‘‘आगामी स्थानिक स्वराज्य संस्थांच्या सर्व निवडणुका पुरोगामी लोकशाही विचारांच्या ‘महाविकास आघाडी’ बरोबर एकत्रित लढवणार असून, पदाधिकारी व कार्यकर्त्यांनी निवडणुकीच्या तयारीला लागून जिंकण्यासाठी सज्ज राहावे,’’ असे आवाहन राष्ट्रवादी काँग्रेस शरदचंद्र पवार पक्षाचे जिल्हाध्यक्ष जगन्नाथ शेवाळे यांनी केले.
तळेगाव ढमढेरे (ता. शिरूर) येथे शनिवारी झालेल्या पक्षाच्या मेळाव्यात शेवाळे बोलत होते. ते म्हणाले, ‘‘ज्येष्ठ नेते शरद पवार हे आपल्या समोर पर्वत असून, महायुतीने केलेल्या कूटनीतीने विधानसभा निवडणुकीत घात केल्यामुळे पराभव झाला. आगामी निवडणुकीत सर्वांनी जागृत रहा. पक्षाचा ढासळलेला वाडा पुन्हा उभा करण्यासाठी सर्वांनी सज्ज राहावे.’’
यावेळी जिल्हा परिषदेचे माजी अध्यक्ष विजय कोलते म्हणाले, ‘‘विधानसभा निवडणुकीत पराभव झाला असला तरी सर्व नेते मतदार संघात फिरत आहेत. पवारसाहेबांनी बसवलेली राजकारणाची घडी पुन्हा संघटनात्मक कामाने आपण सर्वजण बसवू. सर्वांनी एक दिलाने संघटनात्मक कामास महत्त्व द्यावे.’’ माजी आमदार अशोक पवार म्हणाले, ‘‘पराभव झाला असला तरी खचून जाऊ नये, संघर्ष करा, जय पराजय राजकारणात असतो. मतदारसंघाकडे विशेष लक्ष देणार आहे.’’ देवदत्त निकम म्हणाले, ‘‘विधानसभा निवडणुकीत महायुतीने विविध युक्त्या केल्यामुळे पराभव झाला. आगामी निवडणुका महाविकास आघाडी म्हणून लढवा.’’
यावेळी जिल्हा उपाध्यक्ष बाळासाहेब नरके, महिला जिल्हाध्यक्षा भारती शेवाळे, प्रमोदसिंह गोतारने, अतुल राऊत, तालुकाध्यक्ष विश्वास ढमढेरे, माजी उपसभापती अनिल भुजबळ, उद्योजक राहुल करपे, राजू दरेकर, राजेंद्र जाधव, विनायक घाडगे, मधुकर दोरगे, खंडेराव फराटे, ॲड. संपत ढमढेरे, अशोक धुमाळ, सुभाष वडघुले, सोमनाथ बेंद्रे, नितीन वडघुले, स्वराज तुपे आदींनी मनोगत व्यक्त केले.
यावेळी पोपट भुजबळ, विद्या भुजबळ, सोमनाथ भुजबळ, पूजा भुजबळ, पी. के. गव्हाणे, आबासाहेब करंजे, दत्तात्रेय हरगुडे, दुर्गा चोरगे, संजय काळे, सचिन मचाले, पंडित दरेकर, रवी फडतरे, संजय जगताप, हनुमंत काळे, दादासाहेब रणसिंग, हिरामण गवारे, बाळासाहेब लांडे व बापूसाहेब भोसुरे आदी उपस्थित होते.