तळेगाव ढमढेरे, ता.३० : श्रीक्षेत्र टाकळी भीमा (ता. शिरूर) येथील परिसरात गेल्या दोन दिवसांपासून बिबट्याचा मोठ्या प्रमाणात वावर वाढला आहे. यामुळे बिबट्याची नागरिकांमध्ये दहशत पसरली आहे. यामुळे परिसरात पिंजरा लावावा, अशी मागणी नागरिकांकडून होत आहे.
टाकळी परिसरातील गणेशनगर, होमाची वाडी, काळे वस्ती, पाचर्णे वस्ती, पुरोहित वाडा, खेडे वस्ती आदी परिसरात गेल्या अनेक दिवसांपासून बिबट्याचा वावर वाढला आहे. शेतमजूर, महिला, वृद्ध व्यक्ती व ग्रामस्थांना रस्त्याने जाताना व येताना बिबट्याचे दर्शन होत असल्याने आहे. यामुळे परिसरात पाहणी करून पिंजरा लावावा, अशी मागणी ग्रामस्थांसह पंचायत समितीचे माजी सदस्य सुनील वडघुले, उद्योजक राहुल करपे, ग्रामपंचायत सदस्य नितीन वडघुले, शहाजी काळे, पोलिस पाटील प्रकाश करपे आदींनी केली आहे.
दरम्यान, बुधवारी वनविभागाचे अधिकारी व कर्मचारी तसेच उद्योजक राहुल करपे यांनी बिबट्याचा वावर असलेल्या परिसराची पाहणी करून पिंजरा लावण्याची व्यवस्था केली जाईल, असे आश्वासन दिले आहे.
श्रीक्षेत्र टाकळी भीमा परिसरात उसाचे प्रमाण जास्त असून, शेतकऱ्यांसह कुटुंबातील सर्व सदस्य शेतामध्ये राबत आहेत. तसेच शालेय विद्यार्थी परिसरातून निमगाव म्हाळुंगी येथे जातात. अंधार पडल्यानंतर बिबट्याचे दर्शन होत आहे. काही ठिकाणी बिबट्या दिवसाही दिसत आहे. वनविभागाने गांभीर्य लक्षात घेऊन योग्य त्या ठिकाणी पिंजरा लावावा, त्यासाठी ग्रामस्थ सहकार्य करतील असे पंचायत समितीचे माजी सदस्य सुनील वडघुले यांनी सांगितले.

07828