तळेगाव ढमढेरे, ता. १८ : निमगाव म्हाळुंगी (ता. शिरूर) गावात व परिसरातील विविध वाडी- वस्तीवर सात ते आठ बिबट्यांनी एकत्रित धुमाकूळ घातला आहे. येथील शेतकरी पंढरीनाथ चव्हाण यांच्या शेतामध्ये व घराजवळ सात ते आठ बिबट्यांचा मेंढरांसारखा कळप दिसून आला आहे. हे सर्व बिबटे एकत्रित फिरत आहेत. बिबट्यांचे वास्तव्य वाढल्याने नागरिकांमध्ये घबराटीचे वातावरण निर्माण झाले आहे.
पंढरीनाथ चव्हाण यांच्या घराजवळ व शेताजवळ बुधवारी (ता. १७) रात्री येथील काही शेतकऱ्याला रस्त्याने जाताना सात ते आठ बिबटे दिसले. त्यांनी अंधारात सदर बिबट्यांचा व्हिडिओ काढला आणि तो समाज माध्यमावरील ग्रुपवर टाकला. गावात एका वेळेस इतके बिबटे पाहून घबराटीचे वातावरण निर्माण झाले आहे. वनविभागाने त्वरित परिसराची पाहणी करून बिबट्याचा बंदोबस्त करण्यासाठी पिंजरा लावावा, अशी मागणी रावसाहेब चव्हाण व ग्रामस्थांनी केली आहे.
दरम्यान, गावातील बिबट्यांचा वावर पाहता ग्रामपंचायतीतर्फे वनविभागाला पत्र व्यवहार केला असल्याचे सरपंच सचिन चव्हाण व पोलिस पाटील किरण काळे यांनी सांगितले.
दरम्यान, टाकळी भीमा (ता. शिरूर) येथे तळेगाव ढमढेरे रस्त्याजवळ बाळासाहेब ढमढेरे यांच्या शेतात बुधवारी सकाळी बिबट्याचे दर्शन झाले असून, सोमनाथ चव्हाण यांच्या दुचाकीचा बिबट्याने पाठलाग केला. चव्हाण यांनी वेगात गाडी नेल्याने ते बचावले आहेत.
नागरिकांनी खबरदारी घ्यावी व बिबट्यापासून स्वतःचे संरक्षण करावे, असे आवाहन पंचायत समितीचे माजी सदस्य सुनील वडघुले व पोलिस पाटील प्रकाश करपे यांनी केले आहे. शासनाच्या वनविभागातर्फे बिबट परिसरात सावधानतेचा इशारा दिला असून, नागरिकांनी सुरक्षितता राखण्यासाठी पुढील प्रतिबंध करण्याचे आवाहन केले आहे.