तळेगाव ढमढेरे, ता. १६ : तळेगाव ढमढेरे (ता. शिरूर) येथून नारायणपूर (ता. पुरंदर) येथे श्री दत्ताच्या दर्शनासाठी गेलेल्या युवकांच्या दुचाकीला टेम्पोची धडक बसून झालेल्या अपघातात जखमी झालेल्या दोन युवकांचा उपचारादरम्यान मृत्यू झाला.
तळेगाव ढमढेरे येथील समीर संभाजी ढमढेरे (वय २१) व सार्थक विजय ढमढेरे (वय २०) व दीपक दत्तात्रेय ढमढेरे हे तिघे युवक दुचाकीवरून गुरुवारी (ता. ११) नारायणपूर येथे देवदर्शनासाठी गेले होते. देवदर्शन करून तळेगाव ढमढेरे येथे घरी परतत असताना शिंदवणे घाटात समोरून भरधाव आलेल्या टेम्पोची त्यांच्या दुचाकीला जोरात धडक बसून अपघात झाला. त्यात समीर व सार्थक हे दोघे गंभीर जखमी झाले, तर दीपक किरकोळ जखमी झाला होता. गंभीर जखमी असलेल्या समीर व सार्थक यांच्यावर पुणे येथील खासगी रुग्णालयात उपचार चालू होते. उपचार सुरू असताना मंगळवारी (ता. १६) सकाळी दोघांचाही मृत्यू झाला. याबाबत दीपक ढमढेरे याने उरुळी कांचन (ता. हवेली) पोलिस ठाण्यात फिर्याद दिली आहे. पोलिसांनी टेम्पो चालकावर गुन्हा दाखल केला आहे.
दरम्यान, मृत्यू झालेल्या दोन्ही युवकांवर मंगळवारी तळेगाव ढमढेरे येथील भीमाशेत येथे शोकाकुल वातावरणात अंत्यसंस्कार करण्यात आले. दोघांच्याही मृत्यूबद्दल परिसरात हळहळ व्यक्त होत आहे.