तळेगाव ढमढेरे, ता. १९ : तळेगाव ढमढेरे (ता. शिरूर) या गावातून शिक्रापूर-न्हावरा हा राष्ट्रीय महामार्ग जात असून, या रस्त्याचे काम सध्या प्रगतिपथावर आहे. हा राष्ट्रीय महामार्ग गावातून नेण्यास ग्रामस्थांनी विरोध दर्शवला आहे. येथील राष्ट्रीय महामार्ग गावातून नेल्यास विविध अडचणींना ग्रामस्थांना तोंड द्यावे लागणार असल्याचे ग्रामसभेतील ठरावात काही ग्रामस्थांचे म्हणणे आहे. रस्त्याच्या समस्यांविषयी ग्रामस्थांतर्फे खासदार डॉ. अमोल कोल्हे यांना निवेदन देण्यात आले.
दरम्यान, ग्रामस्थांच्या निवेदनाची दखल घेत खासदार डॉ. अमोल कोल्हे यांनी राष्ट्रीय महामार्ग विभागाचे कार्यकारी अभियंत्यांना पत्र पाठवले असून, तळेगाव ढमढेरे ग्रामस्थांनी विविध समस्या लक्षात घेऊन गावातून या महामार्गाला विरोध दर्शविला आहे. ग्रामस्थांच्या तक्रारींची त्वरित स्थळ पाहणी करून गावकऱ्यांच्या समस्या सोडवण्यासाठी कोणत्या उपाययोजना करता येतील याचा आढावा घेऊन सामंजस्याने नियमानुसार रस्त्यासंदर्भात तोडगा काढावा अशी सूचना कोल्हे यांनी सार्वजनिक बांधकाम विभागाला पत्राद्वारे केली आहे.

तळेगाव ढमढेरे ग्रामस्थांच्या समस्येविषयी तात्काळ चर्चा करून शिक्रापूर-न्हावरा महामार्गसंदर्भात सामंजस्याने तोडगा काढला जाईल.
- ऋषिकेश हजारे, शाखा अभियंता, राष्ट्रीय महामार्ग उपविभाग