संजय बारहाते
टाकळी हाजी : येथील प्राथमिक आरोग्य केंद्रातील वैद्यकीय अधिकारी व कर्मचाऱ्यांचे निवासस्थान सध्या अत्यंत जीर्णावस्थेत असून ते धोकादायक बनले आहे. इमारतीचा स्लॅब कोसळण्याच्या स्थितीत आहे. तरीदेखील काही कर्मचारी जीव मुठीत घेऊन या निवासस्थानात राहत आहेत.
टाकळी हाजी (ता. शिरूर) येथील प्राथमिक आरोग्य केंद्रांतर्गत पिंपरखेड, जांबूत, फाकटे, वडनेर अशी चार उपकेंद्रे कार्यरत आहेत. सुमारे ४० हजार लोकसंख्या या केंद्राच्या माध्यमातून आरोग्यसेवा घेत आहे. परिसरातील काठापूर, चांडोह, शरदवाडी, माळवाडी, म्हसे, डोंगरगण, निमगाव दुडे आदी गावांतील रुग्ण या केंद्रात येतात. दररोज सुमारे १०० रुग्ण या ठिकाणी उपचारासाठी येतात. दोन वैद्यकीय अधिकारी कार्यरत असून, परिसरातून चांगला प्रतिसाद मिळतो आहे. मात्र, या केंद्राची मुख्य इमारत सुमारे ४० वर्षां पूर्वीची आहे . वारंवार दुरुस्ती करूनसुद्धा इमारत व निवासस्थान मोडकळीस आले आहे. वैद्यकीय अधिकाऱ्यासाठी एक नवीन निवासस्थान बांधण्यात आले असले तरी इतर कर्मचाऱ्यांसाठी कोणतीही सुरक्षित राहण्याची सोय नाही. त्यामुळे काही कर्मचारी मोठ्या धोक्याचा सामना करत जुनी इमारत वापरत आहेत. अनेक वेळा स्लॅबचे सिमेंट खाली पडत आहे.

पिंपरखेड, जांबूत उपकेंद्रांतील जागा रिक्तच
पिंपरखेड व जांबूत उपकेंद्रांतील समुदाय वैद्यकीय अधिकाऱ्यांच्या जागा अनेक दिवसांपासून रिक्त असून, त्यामुळे येथील नागरिकांना आरोग्यसेवा मिळण्यात अडथळे येत आहेत. नागरिक व स्थानिक प्रतिनिधींनी या रिक्त जागा तातडीने भराव्यात तसेच टाकळी हाजी आरोग्य केंद्रासाठी नवीन निवासस्थान बांधण्यात यावे, अशी मागणी जिल्हा परिषद प्रशासनाकडे केली आहे.

0762