थेऊर, ता. १४ : वाघोली (ता. हवेली) परिसरात लॅपटॉप चोरून पळून चाललेल्या एका अट्टल चोरट्याला लोणी काळभोर पोलिसांनी कुंजीरवाडी (ता. हवेली) येथे बुधवारी (ता. १३) मोठ्या शिताफीने अटक केली. सागर नागराज (वय ३१, रा. महादनूर, ता. अंबूर, जि. वेल्लूर, तामिळनाडू) असे अटक केलेल्या आरोपीचे नाव आहे. त्याच्याकडून १ लाख ९५ हजार ४२१ रुपये किमतीचे ५ लॅपटॉप हस्तगत करण्यात पोलिसांना यश आले.
याबाबत लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांनी माहिती दिली की, तपास पथकातील पोलिस अंमलदार चक्रधर शिरगिरे व शैलेश कुदळे हे पोलिस ठाण्याच्या हद्दीत गस्त घालत होते. त्यावेळी त्यांना कुंजीरवाडी येथील चिंतामणी पार्क प्लॉटींगजवळ एक व्यक्ती संशयितरीत्या उभा असून, त्याच्या पाठीवर काळ्या रंगाची जड वजनाची बॅग अडकवली आहे, अशी माहिती खबऱ्यामार्फत मिळाली. त्याच्या अनुषंगाने पोलिसांचे पथक त्या ठिकाणी गेले. तेव्हा पोलिस आल्याची चाहुल लागल्याने तो तेथून पळून जाऊ लागला. मात्र, पोलिसांनी पाठलाग करून त्याला मोठ्या शिताफीने ताब्यात घेतले. त्याची झडती घेतली असता त्याच्या बॅगमध्ये चोरीचे ५ लॅपटॉप मिळून आले. त्याला ताब्यात घेऊन पोलिसांनी अधिक चौकशी केली. त्यात त्याने वाघोली येथून मंगळवारी (ता. १२) पहाटे ५ लॅपटॉप चोरी केल्याची कबुली दिली. याप्रकरणी त्याच्या विरोधात वाघोली पोलिस ठाण्यात गुन्हा दाखल केला आहे.