थेऊर, ता. १९ : लोणी काळभोर पोलिस ठाण्याच्या हद्दीत हातभट्टीची दारू विक्री करणे, जिवे ठार मारणे, बेकायदा हत्यार जवळ बाळगणे, जबरी चोरी, दुखापत करणे, धमकावणे, खुनाचा प्रयत्न करणे असे गंभीर गुन्हे करून परिसरात दहशत निर्माण करणाऱ्या पाच अट्टल गुन्हेगारांना लोणी काळभोर पोलिसांकडून २ वर्षांसाठी पुणे शहर, पिंपरी-चिंचवड व जिल्ह्यातून तडीपार करण्यात आले आहे, अशी माहिती पुणे शहर परिमंडळ ५ चे पोलिस उपायुक्त डॉ.राजकुमार शिंदे यांनी दिली आहे.
टोळी प्रमुख जाफर शाजमान इराणी(वय ४३), मजलुम हाजी सय्यद(वय ४८), शब्बीर जावेद जाफरी(वय ३८), शाजमान हाजी इराणी (वय ६२, चौघेही रा. इराणी गल्ली, पठारे वस्ती, कदमवाकवस्ती, ता. हवेली) व सागर संदीप गुडेकर (वय २४ रा. इंदिरानगर, कदमवाकवस्ती, ता.हवेली) अशी तडीपार करण्यात आलेल्या गुन्हेगारांची नावे आहेत. टोळी प्रमुख जाफर इराणी व त्याचे तीनही साथीदार लोणी काळभोर पोलिस ठाण्याच्या हद्दीतील सराईत गुन्हेगार आहेत. हे पाचही गुन्हेगार परिसरामध्ये दहशत निर्माण करत होते.तसेच सामान्य नागरिकांना वारंवार त्रास देत होते.लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांनी गुन्हेगाराचा अभिलेख तपासून तडीपार करण्याचा प्रस्ताव पोलिस उपायुक्त डॉ.राजकुमार शिंदे यांना पाठविला होता. महाराष्ट्र पोलिस अधिनियम सन १९५१ चे कलम ५५ प्रमाणे गुन्हेगारांना पुणे शहर, पिंपरी चिंचवड शहर व पुणे ग्रामीण जिल्ह्याच्या हद्दीतून २ वर्षांसाठी तडीपार करण्यात आले आहे. ही कारवाई परिमंडळ ५ च्या वरिष्ठ अधिकाऱ्यांच्या मार्गदर्शनाखाली लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे, गुन्हे शाखेच्या पोलिस निरीक्षक स्मिता पाटील, उपनिरीक्षक उदय काळभोर, पोलिस हवालदार तेज भोसले, सुनील नागलोत, दीपक सोनवणे, प्रशांत नरसाळे, योगिता भोसुरे आदींनी केली.

जानेवारीपासून १३७ गुन्हेगारांवर कारवाई
जानेवारी २०२५ पासून परिमंडळ ५ कार्यालयाकडून २० सराईत गुन्हेगारांवर एमपीडीए नुसार कारवाई, ११ मोका अंतर्गत ७६ गुन्हेगारांना जेरबंद, तर ४१ गुन्हेगारांना तडीपार करण्यात आले आहे. एकूण १३७ सराईत गुन्हेगारांवर परिणामकारक कारवाई करण्यात आली आहे.