थेऊर, ता. २० : गुन्हे शाखा व पुणे शहर पोलिस पथकाने लोणी काळभोर (ता. हवेली) येथील पाषाणकर बाग परिसरात एकाकडून सुमारे १ लाख ८० हजार ९२० रुपये किमतीचा ७ ग्रॅम ९९ मिलीग्रॅम एमडी हा अमली पदार्थ जप्त केला. याप्रकरणी अफसर अहेसान अन्सारी (वय ३१, रा. पाषाणकर बाग, गॅस एजन्सीशेजारी, लोणी काळभोर) याला पकडले आहे.
सहाय्यक पोलिस निरीक्षक नितिनकुमार नाईक, पोलिस उपनिरीक्षक अस्मिता लाड, पोलिस हवालदार मुंडे, महाडिक, गोसावी व चालक पोलिस शिपाई बास्टेवाड, तसेच युनिट-६ कडील सहाय्यक पोलिस निरीक्षक मदन कांबळे, पोलिस हवालदार सकटे, कारखिले, पानसरे हे बुधवारी (ता. १९) रात्री पेट्रोलिंग करत होते. त्यावेळी पाषाणकर बाग येथे मध्यरात्री दीड वाजण्याच्या सुमारास एक व्यक्ती रस्त्याच्या कडेला उभा असलेले दिसला. हालचाल संशयास्पद वाटल्याने त्याकडे निघाले असता त्याने तेथून पळ काढला. मात्र, पोलिसांनी पाठलाग करून त्याला पकडले. त्याच्याकडे १ लाख ८० हजार ९२० रुपये किमतीचे ७ ग्रॅम ९९ मिलीग्रॅम एमडी अमली पदार्थ, २० हजार रुपये किमतीचा सॅमसंग कंपनीचा मोबाइल, इलेक्ट्रिक वजन काटा, पिशवी, चमचा, झिप-लॉक पारदर्शक १७ रिकामे पाउच, असा मुद्देमाल मिळून आला, तो पोलिसांनी जप्त केला. त्याच्या विरुद्ध युनिट ६ गुन्हे शाखेचे पोलिस हवालदार नितीन मारुती मुंढे यांनी फिर्याद दिली.