उरुळी कांचन, ता. ४ : दारू पिण्यास पैसे न दिल्याने शिवीगाळ व दमदाटी करीत एकाने बिअरची बाटली डोक्यात मारून जखमी केल्याची घटना उरुळी कांचन येथील तळवाडी चौकात मंगळवारी (ता. २) रात्री दहा वाजण्याच्या सुमारास घडली. या प्रकरणी संतोष उर्फ बुनक्या शिंदे (पुर्ण माहिती नाही, रा. श्रीराम पतसंस्थेजवळ, तळवाडी चौक) याच्यावर उरुळी कांचन पोलिस ठाण्यात गुन्हा दाखल करण्यात आला. परेश विठ्ठल कांचन (वय २८, रा. आश्रम रोड, गणेश मंदिरासमोर, उरुळी कांचन) असे पिडीत तरुणाचे नाव आहे. त्याने दिलेल्या तक्रारीवरून उरुळी कांचन पोलिस ठाण्यात विविध कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवारी (ता. २) रात्री दहा वाजण्याच्या सुमारास तळवाडी चौकातील शैलेजा हॉटेलजवळील सेवा रस्त्यावरून परेश कांचन हे निघाले होते. त्यावेळी त्यांच्या ओळखीचा संतोष शिंदे उर्फ बुनक्या हा भेटला व त्याने दारू पिण्यासाठी पैसे मागितले. परंतु, कांचन यांनी माझ्याकडे पैसे नाहीत, मी तुला दारू पिण्यासाठी पैसे देणार नाही असे सांगितले. यावरुन दोघांमध्ये बाचाबाची झाली. या रागातून बुनक्याने त्यांना शिवीगाळ व दमदाटी करून त्याचे हातातील बिअरची बाटली कांचन यांच्या डोक्यात मारली व खाली पाडून लाथाबुक्यांनी मारहाणही केली. पुढील तपास पोलिस करीत आहेत.