उद्धट, ता. २ : कुरवली (ता. इंदापूर) येथील कर्मयोगी शंकरराव पाटील विद्यालयात दिंडीचे आयोजन केले होते‌. वारकऱ्यांच्या पारंपरिक पोशाखात आठशेपेक्षा जास्त विद्यार्थ्यांनी सहभाग घेतला.
हातामध्ये स्वच्छतेचा व झाडे लावून झाडे जगवण्याचा संदेश लिहिलेले फलक घेऊन ही दिंडी विद्यालयामधून गावामध्ये मारुती मंदिराच्या भव्य प्रांगणात पोहोचली. तेथे ग्रामस्थांनी दिंडीचे स्वागत केले. सरपंच राहुल चव्हाण, उपसरपंच मंदा चव्हाण, अभिजित माने, संतोष कदम, शिवाजी चव्हाण, बापूराव चव्हाण, प्राचार्य गणेश घोरपडे यांच्या हस्ते विठ्ठल रुक्मिणीचे पूजन करण्यात आले. विविध संत व विठ्ठल रुक्मिणीची वेशभूषा केलेले विद्यार्थी दिंडीचे आकर्षण ठरले. श्रावणी निंबाळकर, ओम साळुंखे, प्रणव मोहिते, राघव निंबाळकर, आर्यन यादव या विद्यार्थ्यांनी हार्मोनिअम, मृदंग, टाळ वाजवत केलेल्या भजनाने वातावरण भक्तीमय झाले होते. संतांची वेशभूषा केलेले विद्यार्थी व विठ्ठल रुक्माईची ग्रामस्थांनी पाद्य पूजा केली. विद्यालयाच्या मुली, शिक्षक, शिक्षिका व ग्रामस्थ महिलांनी फुगडी खेळण्याचा आनंद लुटला. टाळकरी, पताका घेतलेल्या विद्यार्थ्यांनी विठुरायाच्या नाम घोषात पालखी नाचवत छोटेसे रिंगण केले. जिल्हा परिषद शाळेचे विद्यार्थीही या सोहळ्यात सहभागी झाले.
यावेळी सचिन दीक्षित, दिनेश यादव, शिवाजी मोरे, बाळासाहेब मोरे, मेहमूद मुलाणी, अभिमन्यू चव्हाण, ज्योती धावणे, भारत काकडे, बापूराव कदम, अंबादास कांबळे, विशाल तुपे, शोभा पोळ आदी उपस्थित होते.