उंडवडी, ता. २३ : उंडवडी कडेपठार (ता. बारामती) हद्दीत सोनवडी सुपेच्या वीज रोहित्रांना वीज पुरवठा करणाऱ्या उच्च वाहिनीच्या खांबाला काविळीच्या वेलीने जमिनीपासून तारांपर्यंत वेढले आहे. त्यामुळे येथे अपघात होण्याची शक्यता आहे.
सोनवडी- उंडवडी कडेपठार रस्त्यावर या दोन गावांच्या शिवेवरील पाझर तलावानजीक विजेच्या मुख्य व उच्च दाब वाहिनी गेल्या आहेत. मात्र, या विजेच्या वाहिन्यांचे खांब तलावाच्या पाण्यातून गेले आहेत. या खांबाला काविळीच्या वेलांनी वेढा टाकला आहे. विशेष म्हणजे, येथील तलाव पाण्याने तुडुंब भरला आहे. या पाण्याजवळील खांबावर काविळीचा वेल विजेच्या तारांपर्यंत पोहचला आहे. त्यामुळे वीजेचा प्रवाह पाण्यात उतरून मोठा अपघात होण्याची शक्यता आहे. त्यामुळे महावितरण कंपनीने तातडीने या खांबावरील वेल काढावेत, अशी मागणी शेतकरी करीत आहेत.