उरुळी कांचन, ता. २७ : लोणी काळभोर (ता. हवेली) परिसरातील इराणी समाज बांधवांसाठी रिपब्लिकन पार्टी ऑफ इंडिया (आठवले गट) पुणे शहर च्या वतीने पक्षाच्या पदाधिकाऱ्यांकडून दफनभूमीची मागणी केली आहे. याबाबतचे लेखी निवेदन जिल्हाधिकारी जितेंद्र डुडी यांना दिले आहे. तसेच शिरूर- हवेली खासदार डॉ. अमोल कोल्हे यांनाही या आशयाचे निवेदन दिले आहे. याप्रसंगी पुणे शहर संघटक जाफर इराणी, सचिव बाळासाहेब जानराव, संघटक परशुराम वाडेकर, अध्यक्ष संजय सोनवणे, प्रभारी शैलेश चव्हाण, महिला अध्यक्ष सलिना जेफरी आदी पदाधिकारी उपस्थित होते. इराणी अल्पसंख्याक धर्मियांसाठी जिल्ह्यामध्ये दफनविधी करण्यासाठी जागा उपलब्ध नाही. त्यामुळे इराणी समाजाची अत्यंत गैरसोय होत आहे. दफनविधी जागेसाठी सातत्याने पाठपुरावा करत आहोत. जागा लवकरात लवकर उपलब्ध करून द्यावी, असे निवेदनात म्हटले आहे.